Kryetari i Bashkisë së Tiranës, Erion Veliaj, denoncoi sot dhënien e lejeve nga ish -kryebashkiaku Basha 6 ditë përpara lënies së detyrës. Në një prononcim për mediat, kryebashkiaku Veliaj tha se këtë fundjavë ka pasur disa lajme jo të këndshme për “pabesitë” që i janë bërë qytetit tonë. “Janë bërë “pabesi” në mes të Tiranës nga ish-kryetari i Bashkisë. 6 ditë para se të merrja detyrën dhe para se të betohesha, ndërkohë që zgjedhjet kishin mbaruar, unë dhe kundërshtari kishim uruar njeri-tjetrin, Tiranës iu bë një pabesi. Iu shtua për dy vjet një leje që do të skadonte atë javë, në rrugën “Donika Kastrioti”. Është një pallat që ju e keni parë, nuk ka as garazhe, as kate nëntokësore”, tha Veliaj. Ai theksoi se flasim për ”pabesinë” e Farkës, ndërkohë që i kemi “pabesitë” në mes të Tiranës dhe si ish kryetari i komunës së Farkës, si ish-kryetari i Bashkisë së Tiranës kanë një mentalitet: “tokë e djegur, pas meje qameti”.
Kryebashkiaku i Tiranës tha se për të ndrequr gabimet nuk duhet të paguhen nga taksat e dikujt që s’ka faj për këtë situatë. “Kjo është arsyeja pse në mbledhjet e Këshillit Bashkiak ne kemi marrë një vendim që përveç gjobës, e gjithë kostoja e ndërtimit do i faturohet në formën e një fature, pasi Bashkia ta ketë kryer punën, kompanisë”, sqaroi Veliaj. Sipas tij, këto 100 ditë është vënë re se ka qenë kryesisht menaxhimi i “pabesive” që është trashëguar nga administrata e Bashkisë apo komunave që janë keqmenaxhuar.
Interesimit të mediave se qytetarët janë dëmtuar duke blerë këto apartamente në disa zona dhe momentalisht janë pa ashensorë, pa hipotekë dhe çfarë do të ndodhë me ta, Veliaj iu përrgjigj: “Ne kemi një plan për hipotekimin e 300 pallateve që kanë mbetur pa hipotekë. Do të fillojmë para Vitit të Ri, më vjen mirë që dhuratë për disa familje për Vitin e Ri do të jetë hipoteka. Një ekip i Bashkisë që po merret me një problem i cili prek mbi 20 mijë banorë, megjithatë pyetja është: A mund të jetë Bashkia, me mundësitë që ka në mënyrë konstante vetëm një seli emergjencash? Këtu na duhet edhe pak qytetari. Në një vend ku janë shkelur kushtet e lejes, në një vend që të është thënë se ka ashensorë dhe s’ka, në një mall i cili nuk ka cilësinë e asaj që ka në letër, ai mall nuk duhet blerë. Në momentin që keni në kontratë një vend parkimi dhe pallati s’ka pikë parkimi, atëherë dikush po ju gënjen dhe arsyeja pse e përmend sërish pallatin te rruga “Donika Kastrioti” është sepse ajo është një gënjeshtër në bashkëpunim me ish-kryetarin e Bashkisë. Sot, dëgjojmë u themi njerëzve: O burra në protestë!Protestë për çfarë? Për qytete që s’janë menaxhuar fare, për qytete që pasi ke qenë dy vjet në Holandë vjen javën e fundit për të firmosur lejet dhe për t’i bërë “gjëmën”e fundit këtij qyteti! Kjo vjen era pabesi dhe era hipokrizi”.
