Kryetari i Partisë Demokratike, Lulzim Basha, ndodhet në SHBA, ku ka marre pjesë në ceremoninë e inagurimit të Presidentit të ri Donald Trump.
Basha përmes një statusi në profilin e tij në Facebook, shkruan se ishte i ftuar në Lutjen Kombëtare Ndërfetare në Katedralen e Washingtonit, që përmbylli ceremoninë e inagurimit të Presidentit Trump.
“Nder dhe privilegj i rrallë të isha i ftuar në Lutjen Kombëtare Ndërfetare në Katedralen e Washingtonit, që përmbylli ceremoninë e inagurimit të Presidentit Trump.
Tradita e këtij rituali madhështor daton nga inagurimi i Presidentit të parë të SHBA, George Washington.
Udhëheqës shpirtërorë të të gjitha feve lexuan pjesë nga Tora, Bibla, Kurani dhe shkrime të tjera të shenjta dhe u bashkuan në lutje për suksesin e Presidentit Trump dhe administratës së re si dhe për paqe dhe prosperitet në Amerikë dhe në mbarë botën.
Pas ceremonisë pata rastin të jap përshtypjet e mia në median amerikane mbi inagurimin e Presidentit Trump, ceremoninë e Lutjes Kombëtare dhe traditën unike shqiptare të bashkëjetesës fetare. Zoti e bekoftë Amerikën! Zoti e bekoftë Shqipërinë!” – përfundon mesazhin e tij kreu i opozitës.
