Partia Demokratike dhe aleatët e saj kanë dakordësuar qëndrimin për të nisur një stinë protestash në vend si dhe për të vendosur një marrëdhënie të kushtëzuar me Parlamentin. Kryetari i opozitës, Lulzim Basha, priti dje në selinë e PDsë kryetarin e PR-së, Fatmir Mediu, kreun e PAA-së, Agron Duka, kreun e LZHKsë, Dashamir Shehin dhe kreun e PDK-së, Nard Ndoka, me të cilët diskutoi mbi hapat që do të ndiqen për organizimin e protestave popullore në të gjithë vendin.
Burime nga takimi me dyer të mbyllura, që zgjati për 90 minuta, sqarojnë se data më e mundshme për organizimin e protestave është data 27 janar. Vendimi për datën e zhvillimit të protestave do të merret sot në mbledhjet që kreu i PD-së, Lulzim Basha, do të zhvillojë me grupin parlamentar dhe kryetarët e PD-së në rrethe.
Në përfundim të takimit me aleatët e djathtë, Basha mohoi që pas protestës opozita të ngrejë një çadër të dytë në bulevard, por premtoi bashkimin e shqiptarëve në një aleancë vlerash kundër qeverisë dhe Kryeministrit Rama.
“Përsëritje nuk do të ketë, do të ketë të reja. Do të jetë një vullnet edhe më i fortë i opozitës dhe jam i sigurt, një përgjigje akoma më e madhe popullore. Protestat janë pjesë e një aksioni kompleks opozitar, qëllimi i të cilit është të mobilizojë të gjithë energjitë pozitive të shqiptarëve. Të thërrasë të gjithë shqiptarët në një aleancë vlerash, që përfaqëson ky koalicion opozitar. Ne marrëdhënien me Parlamentin do ta kemi të kushtë- zuar me interesin publik dhe me aktin e rëndë e të pafalshëm që është dhunimi i Kushtetutës”, tha Basha.
Kreu i PD-së theksoi se protestat popullore janë thirrur në një kohë që qytetarët nuk kanë mundësi të ushqehen dhe qeveria bëhet gati të nisë aksionin e ujit. “Opozita e ka marrë këtë angazhim në një kohë kur 300 mijë shqiptarë nuk sigurojnë dot bukën e gojës. Ku 49% e shqiptarëve nuk paguajnë dot faturën e ujit dhe të dritës dhe krimi i veshur me pushtet, pushteti i bërë njësh me krimin me figurën e Edi Ramës, bëhet gati të fillojë aksionin për ujin”, tha kreu i PD-së.
ALEATËT
Në takimin me dyer të mbyllura, kryetarët e partive aleate të PD-së mësohet t’i kenë shprehur një sërë shqetësimesh Bashës. Burime nga takimi me dyer të mbyllura sqarojnë për “Panorama” se, me shqetësim, Bashës i është përcjellë pozicionimi i ri me LSI-në e Monika Kryemadhit.
Sipas të njëjtave burime, kryetarët e partive aleate të PD-së i kanë kujtuar Bashës se LSI ka po aq përgjegjësi sa edhe PS për keqqeverisjen e vendit pasi disa muaj më parë ishte në qeveri me ta. Bashës i është sugjeruar që të mos e shohë LSI-në si një aleat potencial edhe për zgjedhje, pasi një koalicion i tillë nuk do ta rriste të djathtën as në sytë e qytetarëve shqiptarë.
Mësohet se kreu i PD-së, Basha, ka sqaruar në takim se aleanca me LSI-në është e qartë dhe ajo lidhet me largimin e Edi Ramës. Basha ka theksuar se për arritjen e këtij qëllimi, PD është e hapur të bashkëpunojë me çdo forcë politike.
Dy kushtet e aleateve
Aleatët e Partisë Demokratike i kanë kërkuar Lulzim Bashës të nxisë rifillimin e punës së komisionit të reformës zgjedhore, pasi në të kundërt ata do të organizohen në një front të ri opozitar. Kërkesën e tyre, aleatët ia kanë përcjellë kreut të PD-së pak ditë pasi zhvilluan një takim të përbashkët mes tyre në lidhje me ndryshimet në Kodin Zgjedhor.
Shqetësimi kryesor i aleatëve të PD-së lidhet me vonesën që ka rifillimi i punës në Komisionin e Posaçëm për Reformën Zgjedhore, duke ngritur, sipas tyre, dyshimet se mund të ketë një ndryshim të përbashkët të Kodit nga PS e PD në dëm të partive të vogla.
Dy shqetësimet kryesore lidhen me ndryshimet në Kodin Zgjedhor dhe hartën administrative-territoriale, ku aleatët kërkojnë shtim të një- sive administrative duke filluar nga zgjedhjet lokale të vitit 2019. PANORAMA
ma.me
