Kryetari i Partisë Demokratike, Lulzim Basha deklaroi nga SHBA-ja se “zgjedhjet e lira dhe të ndershme janë domosdoshmëria numër një, që Shqipëria të ecë përpara”, ndërsa theksoi se për këtë ka marrë mbështetjen e plotë të Shteteve të Bashkuara të Amerikës.
Në vijim të vizitës së tij në SHBA, Basha zhvilloi një bashkëbisedim me drejtues dhe anëtarë të VATRA-s për situatën në Shqipëri, vizitën në SHBA dhe ndau me ta alternativën e Partisë Demokratike për ta nxjerrë vendin nga kriza dhe për të kthyer shpresën shqiptarëve.
Tre janë çështjet kryesore në të cilat u ndal zoti Basha e për të cilat mori mbështetjen e SHBA-ve që janë dekriminalizimi, reforma në drejtësi, zgjedhjet e lira dhe të ndershme.
“Kjo qeveri e di që gjykimi popullor po të bëhet sot apo të dielën e ardhshme do ta nxjerrë menjëherë në opozitë. Ndaj po merr të gjitha masat që t’i rrethojë zgjedhjet e ardhshme me kriminele dhe me paratë e korrupsionit”, tha Basha.
Në këtë drejtim ai theksoi se PD do të kërkojë “votim dhe numërim elektronik për të kufizuar mundësitë e krimit dhe njerëzve të pushtetit, që vijnë me trastat e korrupsionit që të blejnë apo intimidojnë votuesit dhe numëruesit e votës”.
Po ashtu do të kërkohet “kufizimi i përdorimit të parasë në fushatë, duke parë modele edhe të financimit 100% të partive politike nga financat publike dhe kriminalizimin e financimit privat”.
Dhe së treti, vijoi Basha, do të kërkohet auditimin strikt të partive politike, jo sa marrin por sa shpenzojnë. “Po të shohësh se çfarë shpenzojnë e kupton se interesat e tyre të lidhura me interesat e oligarkëve mundësojnë që në fushatat elektorale të hidhen miliona e miliona euro në çdo qytet, me një qëllim, kapjen dhe blerjen e vullnetit të qytetarëve”, tha ai.
Por parakusht për këtë, sipas kreut të PD-së “është zbatimi i ligjit të dekriminalizimit, nxjerrja e kriminelëve jashtë Parlamentit, jashtë bashkive dhe zyrave të tjera të pushtetit, ku janë të paligjshëm në raport me legjislacionin e vendit dhe me ligjin për dekriminalizimin”.
Basha theksoi se për këtë nevojitet reforma në drejtësi. “Një drejtësi e pavarur, profesionale, e trajnuar nga SHBA-të. Një Byro Kombëtare e Hetimit që detyrë të parë të kenë vënien para drejtësisë të zyrtarëve të nivelit të lartë që vjedhin shumat e parave në nivele të tilla marramendëse. E duke bërë këtë deprivojnë fëmijët dhe familjet shqiptare nga buka e gojës, nga vendet e punës dhe nga zhvillimi. Këto janë tre çështjet për të cilat në Uashington kam marrë jo vetëm mirëkuptim, por edhe mbështetje të madhe”, tha Basha.
Gjatë qëndrimit të tij në New York, Kryetari i PD-së Lulzim Basha iu bashkua besimtarëve në Meshën e së Dielës së Larit në Kishën Katolike shqiptare Zoja e Shkodrës, në Hartsdale – New York, e cila shënon dhe nisjen e Javës së Madhe të Pashkëve Katolike. Pas meshës, famulltari i kësaj kishe Dom Pjetër Popaj dha një pritje në Qendrën Kulturore “Nënë Tereza” duke uruar të gjithë besimtarëve javën e Madhe të Pashkëve.
