Kryedemokrati Lulzim Basha ka dalë sot para mediave duke deklaruar se PD dhe opozita e bashkuar është që t’iu japë shqiptarëve një orë e më parë garancitë për t’iu drejtuar kutive të votimit dhe për t’u bashkuar në një votë plebishitare për të larguar këtë të keqe.
Ai tha se loja e Edi Ramës për të bllokuar reformën zgjedhore dhe për të marrë peng integrimin doli zbuluar.
Ndërkohë Lulzim Basha mohoi të ketë një propozim amerikan për sistemi zgjedhor sipas Danimarkës. Ai tha se i siguron të gjithë se nuk ka asnjë të tillë. Kjo deklaratë e Bashës bëhet pavarësisht se ambasadorja Yuri Kim sot bëri apel të qartë që të merret në konsideratë sistemi me lista të korrigjuara.
“Loja e Edi Ramës me shpresën se duke shkatërruar Teatrin Kombëtar do të shkatërronte edhe reformën zgjedhore dhe shanset për t’iu dhënë shqiptarëve një orë e më parë zgjedhje të lira dhe të ndershme dhe të merrte peng procesin e integrimit europian të vendit tani doli zbuluar. Të gjithë e kanë parë, shqiptarë dhe të huaj këtë plan mafioz që ka për qëllim të pengojë reformën zgjedhore, të pengojë integrimin europian të vendit dhe të lejojë Edi Ramën të përdorë të njëjtat mekanizma që ka përdorur edhe më parë për të manipuluar vullnetin e shqiptarëve dhe për ta mbajtur Shqipërinë peng të krizave ciklike. Ne jemi të vendosur të mos e lejojmë këtë. PD dhe opozita e bashkuar është e vendosur që t’iu japë shqiptarëve një orë e më parë garancitë për t’iu drejtuar kutive të votimit dhe për t’u bahskuar në një votë plebishitare për të larguar këtë të keqe”, deklaroi Basha.
Por çfarë tha sot ambasadorja amerikane?
Të nderuar anëtarë të Këshillit Politik për Reformën Zgjedhore:
Së pari, unë do të doja të shpreh mbështetjen time për të gjithë ju për të rifilluar përpjekjet tuaja për të arritur marrëveshje për reformën zgjedhore. Kjo është një detyrë e vështirë, por ajo që ju keni premtuar të ndërmerrni, dhe se populli i Shqipërisë së bashku me bashkësinë ndërkombëtare shpresojnë me padurim se do të dorëzoni. Ju uroj të gjitha më të mirat teksa ju vazhdoni punën.
E kuptoj që keni bërë përparim të mirë, por ai debat për listën e hapur kundrejt listës së mbyllur mbetet jobindës.
Ndërsa i konsideroni opsionet, pyes veten nëse keni shikuar mundësinë e një sistemi hibrid. Një shembull që na vjen në mendje është Danimarka, e cila ka një sistem hibrid, duke përdorur një listë të korrigjuar sipas metodës D’Hondt.
Unë nuk jam një eksperte nga përtej çdo imagjinate, por unë do të doja të kërkoja që ju ta konsideroni këtë mundësi si një që mund të jetë një kompromis i zbatueshëm.
Ndoshta mund të këshilloheni me ekspertë të OSBE / ODHIR për këtë mundësi.
KIMI YURI
Ambasadore e Shteteve të Bashkuara të Amerikës pranë Republikës së Shqipërisë
/a.r
