Kreu i PD-së, Lulzim Basha, gjatë vizitës në Berlin, ka takuar sot zv/Kryekeshilltarin e Kancelares Angela Merkel, Joachim Bertele.
Lajmin e ka bërë të ditur vetë kreu i demokratëve nëpërmjet një postimi në facebook, ku shkruan se pavarësisht krizës ku ndodhet vendi, do të bëhet gjithçka për të hapur rrugën Europiane të Shqipërisë.
Basha shkruan më tej se, sipas tij, është koha për të ndaluar të gjithë politikanët e lidhur me krimin, për të cilët u shpreh se janë kërcënim për perspektivën europiane të Shqipërisë.
Postimi i plotë:
Ne qendër të Dialogut të Nivelit të Lartë që po zhvillohet nga Fondacioni Konrad Adenauer në bashkëpunim me Këshillin Ekonomik Gjerman në Berlin, është angazhimi i Gjermanisë për perspektivën europiane të Ballkanit Perëndimor. Referues kryesor ishte edhe dr. Joachim Bertele, zvKryekëshilltari i kancelares Angela Merkel për Politikat e Jashtme, të Sigurisë dhe Zhvillimit.
Pavarësisht krizës që po kalon aktualisht Shqipëria, problemeve me lidhjet e politikës me krimin, shitblerjes së votave, korrupsionit, ne do të bëjmë gjithçka që ashtu siç liberalizuam vizat ti hapim rrugën edhe anëtarësimit të Shqipërisë në Bashkimin Europian.
Nuk ka asnjë diskutim që e ardhmja e Shqipërisë dhe e Ballkanit Perëndimor është BE. Mirënjohje për angazhimin dhe mbështetjen e pakursyer të Gjermanisë në procesin e integrimit Shqipërisë në BE por dhe të ruajtjes së pacënuar të tërësisë territoriale të Kosovës.
Tani është koha për të ndalur politikanët e korruptuar dhe të lidhur me krimin që për interesat e tyre po kërcënojnë perspektivën europiane dhe paqen e stabilitetin në Ballkanin Perëndimor.
g.kosovari
