Kryetari i Partisë Demokratike Lulzim Basha ka kërkuar ndjesë për gabimet e qeverisë “Berisha”. Gjatë aktivitetit të mbajtur me rastin e hapjes së Akademisë Politike të PD Basha tha se forca që ai drejton ka reflektuar për të ecur përpara.
“Kemi bërë gabimet tona që i kanë kushtuar interesit publik. Gabime që padyshim patën rolin e tyre në rotacionin politik të vitit 2013. Duhet të jemi krenar për çfarë arritëm, por kokëulur, zemërhapur, ti themi shqiptarëve, po kemi gabuar, kemi reflektuar, le të shkojmë përpara. Çdo ndjesë duhet të jetë e sinqertë dhe në funksion të një aleance të re me qytetarin shqiptar.”- tha Basha.
Basha i është përgjigjur kritikave në drejtim të tij nga deputetja Majlinda Bregu. Basha tha se duhet t’i përgjigjet kritikave ndaj atyre që ka përballë, duke ironizuar indirekt me Bregun e kritikët e tjerë duke lënë të kuptohet se ky grupim nuk po bën oponencë ndaj qeverisë.
“Në politike duhet t’i përgjigjesh kritikave dhe personit që ke përballë, dhe jo atij që flet dhe vepron mbrapa shpine”, tha Basha gjatë fjalës së tij.
Kryetari i Partisë Demokratike deklaroi se integrimi i vendit është në rrezik nga qeveria e drejtuar nga Edi Rama. Sipas tij, hapja e negociatave është në rrezik për sa kohë qeveria ngre aeroporte për trafikimin e drogës. Ai deklaroi se shpresa e ndryshimit është Partia Demokratike.
“Shpresa e ndryshimit quhet PD, dhe kësaj shprese i prin rinia demokrate. Shqipëria është në një udhëkryq të rrezikshëm për stabilitetin dhe të ardhmen e saj evropiane. Një udhëkryq të rrezikshëm të shkaktuar nga braktisja totale e rinisë shqiptare e qytetarit shqiptar. Eshtë domosdoshmëri që PD të bëjë gjithçka për të fituar zgjedhjet e ardhshme. Për të sjellë në pushtet qytetarin shqiptar, i cili sot është i braktisur, i tradhtuar nga në kryeministër që mendon vetëm për veten e tij dhe një grusht njerëzish e kriminelësh me të cilët shpreson se do të mbajë pushtetin. Integrimi evropian i vendit është në rrezik. Nuk mund të hapen negociatat për një vend që dhunon zgjedhjet, që dhunon maturantët e tij përmes ligjeve të padrejta e klienteliste, nuk mund të hapë negociatat një vend ku vidhet ditën për diell e natën për hënë. Ku mediat quhen kazanë.”- deklaroi Basha./a.m.
