Kreu i grupit Parlamentar i PD Gazment Bardhi ka komentuar rikthimin e Lulzim Bashës dhe kandidaturën për zgjedhjet e 29 korriku.
I ftuar sot në “Kjo Javë” me Nisida Tufën në News24, ai tha se Për aq kohë sa s’ka një vendim, nuk mund të ketë zgjedhje më 29 korrik
“Nuk ka mbaruar gara dhe nuk dua të paragjykoj. Për aq kohë sa s’ka një vendim, nuk mund të ketë zgjedhje më 29 korrik. Unë mendoj dhe vlerësoj se çdo faktor dhe autorë brenda PD-së duhet të mendojë për më të mirën e partisë dhe shuarjen e konfliktit. Nëse nuk e bëjmë do dobësohet PD dhe blloku opozitar”, tha ai.
Ndërkohë sa i takon zgjedhjeve të 2025, ai tha se shqetësimi është që askush nuk e gjen kurajën dhe të diskutojë se çfarë do ndodhë.
“Shqetësimi është që askush nuk e gjen kurajën dhe të diskutojë se çfarë do ndodhë. Ajo që kritikova për përjashtimet, kush i ka bërë, ka bërë gabim. Çdolloj përjashtimi dhe ndasie është e dëmshme. Sot nuk kemi luksin për të humbur as edhe një anëtar. Nga regjimi i Ramës kemi manipulimin e opinionit publik përmes propagandës dhe zgjedhjet e lira. Jam kundër çdo ndasie përjashtimi pasi duhet të kuptojmë se nëse nuk ulemi për të folur, zgjedhjet në 2025 do ketë një rezultat të paraprirë. në fushatën tjetër s’do ketë nevojë as t’i bjerë dajres”, tha ai.
Por a ka gjasa për ta gjetur zgjedhjen në një rrugë gjyqësore?
“Shqetësimi është që procesi i zgjedhjes së lidershipit të mos e fusë PD-në në një ngërç të ri. Druaj dhe kam frikë se do e fusë PD-në në një ngërç legjitimiteti që do vejë në pikëpyetje çuarjen para të partisë”, deklaroi Bardhi.
Ndërkohë sa i takon kandidaturës së dytë për kryetar të PD, atë të Gjergj Hanit, ai thotë: Që në momentin që thoni se rezultati është i njohur, nuk është proces i drejtë transparentë por farsë. Gjykoja që pas 9 shtatorit duhet të ofronim një model të ri të organizmit dhe proceseve brenda PD-së.
“Duhet të ishte larguar me kohë”/ Qetësim i marrëdhënieve me Berishën? Përgjigjet Bardhi
Kreu i Grupit Parlamentar të Partisë Demokratike Gazment Bardhi, ndërsa ka komentuar situtën e vështirë në të cilën PD ndodhet sot, ka deklaruar se ish-kryetari Sali Berisha duhet të ishte tërhequr me kohë në mënyrë që të mos lejonte që PD të përfundonte në këtë gjendje.
Ai ka shtuar se pavarësisht nga sa flitet, nuk ka asnjë afrim mes tij dhe zotit Berisha për të cilin tha se nuk ka ndryshuar qëndrim për sa kohë vlerëson se marrëdhënia e PD me aleatët është shumë e rëndësishme, referuar këtu shpalljes non grata nga ana e SHBA.
“Nuk ka asnjë afrim. Gjatë këtyre ditëve kanë nisur të kërkojnë llogari tek mua për qëndrimet që mban Berisha, psh pse thotë fjalë të mira për ua, a thua se kisha fuqi ta ndaloja kur fliste keq për mua. Unë nuk kam ndryshuar qëndrim ndaj zotit Berisha në asnjë çështje për të cilën kemi pasur diskutime. Vlerësoj marrëdhënien me SHBA si prioritet të PD. Ne kemi humbur 1 vit e gjysmë duke u marrë me njëri tjetrin, unë që të bind Berishën se është gabim dhe ai të më bindë mua për të kundërtën. Unë mendoj se nuk e bëjmë dot. Unë kam objektiv të mund Ramën, jo të përplasem në zgjedhje me Berishën që nga përplasja jonë të fitojë Rama. Duhet vendosur objektivi i çdo opozitari që të ndërtojmë një strategji. Nëse mbajmë ndezur konfliktin brenda PD i vetmi që fiton është Rama. Unë këtë nuk e pranoj dot. Nuk isha as në zgjedhje ku nga 45 minuta fjalim 44 ishin për Ramës”, tha ai.
Bardhi ka sqaruar gjithashtu që pas tentativave për bisedimeve me Edi Palokën nuk ka pasur tentativa të tjera bisedimesh.
“Bisedimet e mia me Palokën ishin transparente. Propozimi im ishte publik dhe nuk u pranua nga grupimi i Berishës. Sot nuk ka asnjë tentativë bisedimesh, ndryshe do ishin publike. Nëse beteja deri në 2025 do jetë kacafytja brenda demokratëve, nga kjo ngrihet vetëm PS dhe Rama. Pjesë e kësaj strategjie dhe këtij projekti nuk bëhem. PD ka nevojë për tre gjëra: të prodhojë ide, të dalë jashtë konfliktit dhe të ringrihet duke i zgjatur dorën çdo demokrati. Berisha duhej të ishte tërhequr për të mos futur në këtë rrëmujë PD shumë kohë më parë. Në konflikt me partnerët tanë strategjik PD vetëm dobësohet, por shoh që Berisha nuk ka ndërmend të bëjë një gjë të tillë. Ajo që kam unë në dorë si demokrat dhe drejtues i PD është çdo bëjmë ne të tjerët për partinë”, është shprehur ai./m.j
