Basha ka tapinë e PD-së, askush nuk ia merr dot më!

Nga Ben Andoni

Më parë ishin thjesht zëra apo ata që nuk e donin pushtetin aq të madh të Bashës. Tashmë për të janë të bindur dhe gjithnjë e më pak thonë se: është zgjatim i pushtetit të vërtetë të Berishës. Kjo, pasi në fakt, ish-kryetari historik ka kuptuar rrezikun që po i kanoset prej tij në shtator dhe cinizmin e pasardhësit të vet. Në vend të së gjithës kemi sërish ndryshime statusore që do t’i shkojnë për shtat dhe do të përshtasin të gjithë strukturën e brendshme të PD-së të jetë vartëse direkte e tij.

Ajo që sot i përmendet Bashës janë humbjet e tre zgjedhjeve rresht, kurse njerëzit që e njohin më mirë strukturën e PD-së i kërkojnë realisht përgjegjësinë për bojkotin e zgjedhjeve. Paçka sesi gjykohet sot, kryetari aktual Basha, pothuaj pati mbështetje totale nga të gjithë strukturat e PD-së dhe këtë publiku e ndjeu pothuaj në të gjitha daljet e njerëzve të saj kryesorë që u angazhuan dhe e mbështetën. Edhe pse u është thënë nga aleatët e tyre politikë ndërkombëtarë që nuk duhet të iknin nga parlamenti; edhe pse nga i gjithë faktori i huaj, që për hir të së vërtetës nuk i shkon për shtat kjo peshë e madhe e Ramës në të gjithë jetën e vendit; ata nuk begenisën asnjë fjalë të arsyeshme.

Tashmë ka ardhur radha e statutit, i cili duhet të ndryshojë konform kohëve dhe realiteteve të reja që po kalon PD-ja. Janë të disatat zgjedhje që PD vazhdon të ankohet, ndërsa elektorati i saj vuan dhe pret që të zgjedhurit e saj të tregojnë se çfarë mund të bëjnë. Por, fatkeqësisht, të zgjedhurit e saj janë thjesht tashmë zgjatime të z.Basha dhe justifikues të ndryshimeve të tij. Kuptohet deri në momentin kur nxirren nga sfera e interesave të partisë dhe i afrohen medias për të treguar të vërtetat…e hidhura.

Pa dashur të bëjmë një panoramë të ndryshimeve të reja, që në thelb, të parashtruara kështu duken demokratike, por po t’i shikosh në thelb dhe në lidhje me PD-në e kupton se të gjitha tashmë e kanë vartësinë prej Bashës ose lejen e tij, do kuptosh se është e pamundur të presësh ndryshime reale te kjo forcë politike. Në këtë formë, PD-ja po e pret pushtetin t’i serviret.

Ndaj, rruga më e drejtë për ndryshimet dhe kritikët është më e thjeshtë në dukje por me shumë përkorje dhe përpjekje përpara. Duhet një formacion tjetër i të gjithë këtij kontingjenti të madh të pakënaqurish që të administrojë në mënyrë më demokratike dhe me kanonet e vërteta të së Djathtës Konservatore një elektorat që identifikohet  me PD-në. I vetmi problem është sesi do të menaxhohet kjo amalgamë, që tashmë Basha e përçan me kujdes me indiferencën dhe mënjanimin e kujdesshëm, dhe se kush do e drejtojë. Në rastin e mëtonjësve për kryetar kundër Bashës u kuptua se ata ishin bash të pakënaqur dhe aspak bashkë. Kjo mund të futet në matricën e problemeve dhe të nxjerrë një formacion që t’i rikthejë forcën dhe shkëlqimin këtij elektorati. Por, nëse energjitë do humbin me Bashën, atëherë i bie të luftosh me një personazh, që tashmë ka tapi te PD. Nga ato që prodhojnë pushtet pafund për interesa të ngushta. Jo PD. (Javanews)