Plot 613 kg kokainë janë sekuestruar sot në Portin e Durrësit nga Policia e Shtetit, sasia më e madhe e kapur ndonjëherë në vendin tonë.
Por për Lulzim Bashën, ky superaksion i policisë, nuk ka të bëjë me një angazhim të fuqishëm të shtetit në parandalimin e trafikut, por tregon se nga epoka e kanabisit, vendi ka kaluar në epokën e kokainës dhe kjo tregon se ekonomia është kapur nga paratë e krimit dhe të drogës.
“Jemi para një katastrofe ekonomike. 613 kg kokainë në Durrës u kap pas ndërhyrjes së vendeve partnere. Kokaina u kap pas deklaratës së kreut të mafies italiane që krimin është i lidhur me politikën në Shqipëri. Epoka e kanabisit është pasuar me heroinën, kokainën dhe pastrimin e parave. Nga kanabisi, Ekonomia është në rrezik, pasi po kapet nga krimi. Ndodhemi në emergjencë kombëtare”, deklaroi Basha.
“Bashkia e Tiranës është kthyer në lavatricë pastrimi të parave të pista dhe të drogës, përmes ndërtimeve“, deklaroi Basha
Kryetari i PD thotë se tani rreziku është ekzistencial për shoqërinë, pasi krimi dhe paratë e krimit janë futur në ekonomi.
“Këtu vjen rreziku ekzistencial për shoqërinë, sepse tani rreziku i kriminalitetit është mbartur drejt politikës dhe ekonomisë. Nuk ka një sektor më të qartë që e shpreh këtë sesa sektori i ndërtimeve. Numri i rezidencave të banimit është rritur me 80 për qind. Po përzihen paratë e krimit dhe drogës me paratë e taksave të shqiptarëve”, thotë Basha.
“Ekonomia shqiptare është në prag katastrofe nëse nuk e ndalojmë tani. Rrezikohen mijëra e mijëra vende pune”, vijoi kryetari i PD.
javanews.al/a.ç
