Pas vendimit të Gjykatës së Lartë për “pushim çështje” për deputetët Pjerin Ndreu dhe Arben Ndoka, ka reaguar me një postim në facebook edhe kryetari i Partisë Demokratike, Lulzim Basha.
Ai e cilësoi vendimin si lajm të zi për Shqipërinë, duke theksuar se vota e 21 qershorit dhe beteja e pandalur e opozitës janë zgjidhja.
“Lajm i zi për Shqipërinë, demokracinë dhe parlamentarizmin shqiptar. Çdo shqiptar që pa me zë dhe figurë skenat e shëmtuara të sulmit fizik kundër fjalës së lirë dhe opozitës, është sfiduar. Partnerët tanë amerikanë dhe europianë janë sfiduar. Në vend të dekriminalizimit, si një nevojë urgjente dhe jetike e politikës dhe shoqërisë shqiptare, Edi Rama vulosi veprën e tij të kriminalizmit të pushtetit. Kapja dhe marrja peng e institucioneve nga krimi i veshur me pushtet dhe pushteti i veshur me krim është vepra e tij e zezë. Beteja jonë për dekriminalizmin nuk ndalet, reagimi i qytetarëve është detyrë. Me votë, me gjykimin suprem të votës popullore- kjo është zgjidhja.”, shkruan Basha.
Nga ana tjetër ka reaguar zyrtarisht edhe Partia Demokratike me anë të deputetit Eduart Halimi, menjëherë pasi Gjykata e Lartë ka pushuar çështjen e deputetëve Pjerin Ndreu dhe Arben Ndoka.
Në një deklaratë për mediat Halimi tha se me këtë precedent, u tregua edhe njëherë se drejtësisë i është vënë laku në fut.
Halimi tha se “Vendimi i sotëm është një lajm i zi për drejtësinë”, por nga ana tjetër ai theksoi se opozita nuk tëhriqet.
