Partia Demokratike nuk tërhiqet. Edhe pas vendimit me te fundit te kreut të Kuvendit Gramoz Ruçi për një pushim të gjatë të seancës dhe rinisjen e saj në orën 18:00, grupi parlamentar demokrat ka vendosur të mos lëvizë nga salla.
Deputetët e PD të mbledhur bashkë në sallën e kuvendit, ku kanë vendosur të qëndrojnë pa lëvizur deri në orën 18:00, së bashku me liderin Lulzim Basha.
Mes tyre mbërriti edhe ish-kryeministri Sali Berisha, i cili deklaroi për mediat se mbështet vendimin e grupit dhe i bashkohet atij.
Nderkohe qe Basha ne nje interviste dhene per GSh, teksa ndodhet brenda salles se Kuvendit, ka theksuar mes te tjerash edhe dy kushtet per kthimin ne normalitet te situates.
Z.Basha, çfarë po ndodh në Kuvend? Një koment lidhur me përjashtimin tuaj nga punimet e seancës…
Kjo çështje ka dy anë, e para: është ana ligjore, që maxhoranca thotë nuk jemi të përgatitur për reformën zgjedhore dhe hedh në votë një të drejtë të opozitës që s’mund të shtyhet pafundësisht. Pra, hapet një shteg për krizën që kur maxhoranca s’do debat për një çështje që është e drejtë e jona.
E dyta, ana politike është më e rënda. E nisën javën e kaluar duke hequr sinjalin televiziv dhe sot mohojnë debatin në seancë plenare.
Nuk ka gjë më të rëndësishme sot se sa debati për zgjedhjet. Ne nuk mund ta pranojmë kurrë këtë standard që kërkojnë të vendosin këta.
Ky është një standard diktatorial.
Çfarë kërkoni konkretisht?
Siç e konfirmon edhe raporti i OSBE/ODIHR-it, zgjedhjet u tjetërsuan, u blenë. U blenë nga Edi Rama me ndihmën e krimit dhe ky është fakt. Zgjedhjet u blenë bashkë me krimin dhe pa u rivendosur kushtet për zgjedhje të lira nuk ka asnjë shpresë tjetër për vendin. Nuk ka gjë më të rëndësishme se sa kthimi i legjitimitetit të parlamentit, të qeverisë dhe këto arrihen vetëm me zgjedhje të lira.
Ka 2 parakushte: Reforma zgjedhore që përfshin votimin elektronik dhe mposhtja përfundimtare e krimit. Kjo qeveri ka aleancë me krimin.
Mendoni se do të vijoni të mbani të bllokuar punimet e Kuvendit, të vijoni këtë situatë anormale?
E gjithë Shqipëria është në një situatë anormale. Shqiptarët janë të kërcënuar. Fëmijët janë të pambrojtur përballë krimit i cili po lëshon breshëri plumbash çdo natë. Krimi po sundon pushtetin qendror dhe vendor. Vendi është në katastrofë.
Ndaj, i vetmi kthim në normalitet është shkëputja e krimit nga politika.
Tjetër, duam të krijohen kushtet të ketë liri për të zgjedhur alternativa në zgjedhje. Shqiptarët kanë votuar që të kenë libra për fëmijët e tyre me çmim stratosferike, kanë votuar të kenë pensione mizerabël? Se kështu i bie që shqiptarët me vetëdije kanë votuar dike që po i shtyn drejt largimit, drejt zbrazjes së vendit. Se po zbrazet Shqipëria. Por jo!
Nuk ka ndodhur kështu, sepse vota e tyre nuk është lidhur me alternativën. Qeveria ja ka lidhur votën shqiptarëve me krimin. Pra, pa zgjidhur këtë, qëndresa do të vazhdojë me të gjitha format dhe mënyrat demokratike.
a.ç
