Kreu i opozitës Lulzim Basha tha në mbledhjen e grupit parlamentar të PD se projekligji i dekriminalizimit do të çlirojë institucionet nga personat me rekorde kriminale. Për Bashën dekriminalizimi është filtri i duhur ndaj kriminelëve dhe është i interesit kombëtar të vendit. Basha po ashtu i ka bërë thirrje mazhorancës që të votojë amendimet e bëra nga opozita këtë të mërkurë, në lidhje me testin e drogës.
“Prokejtligji i Dekriminalizimit është një interes kombëtar për të hequr një prej njollave të zeza dhe për të kuruar atë në kohën e demokracinë. Ai vendos filtrin e pakalueshëm e personave me rekorde kriminale nga postet publike. Me këtë ligj çlirohemi nga malavita. Rivendoset morali i shëndosh në gjithë shtetin.
Ju bëj thirrje deputetëve që të japin miratimin e tyre për testin e drogës. Politikëbërësit duhet të japin shembull.
Familja, prindërit shqiptarë investojnë shumë për shkollimin e fëmijëve. Krimi në sistem është mohimi më brutal i këtij investimi. Krimi në sistem e shumëzon me zero dijen, është fundi për gjithçka. Në Shqipërinë e ditëve tona nuk është më hipotetik, por real.”, tha Basha.
