Ministri për Evropën dhe Punët e Jashtme, Ferit Hoxha, ka përshëndetur vendimin e Bashkimi Evropian për heqjen përfundimtare të të gjitha masave ndaj Kosovës, duke e cilësuar atë si një hap të rëndësishëm për të ardhmen evropiane të vendit.
Në një reagim publik, Hoxha u shpreh se ky vendim, edhe pse i vonuar, është një njohje e qartë e përkushtimit të Kosovës ndaj vlerave evropiane.
“Ky hap, edhe pse i vonuar, rikonfirmon përkushtimin e Kosovës ndaj shtetit të së drejtës dhe bashkëpunimit konstruktiv në rajon”, u shpreh ai.
Sipas tij, vendimi i BE-së hap një fazë të re për Kosovën, duke i mundësuar akses të plotë në fondet dhe programet evropiane.
“Vendimi i sotëm hap një kapitull të ri—duke mundësuar qasje të plotë dhe pa pengesa në fondet e BE-së, asistencën dhe bashkëpunimin e gjithanshëm. Ai kontribuon në rindërtimin e besimit dhe forcon më tej besueshmërinë e procesit të integrimit evropian”, theksoi ministri.
Hoxha nënvizoi gjithashtu se ky zhvillim ndihmon në rikthimin e besimit dhe e bën më të besueshëm procesin e integrimit evropian.
“Ai kontribuon në rindërtimin e besimit dhe forcon besueshmërinë e vetë procesit të integrimit”, deklaroi ai.
Duke u ndalur te e ardhmja, ministri theksoi rëndësinë e hapave të mëtejshëm për Kosovën në rrugën drejt BE-së.
“Avancimi drejt rrugës evropiane të Kosovës, përfshirë shqyrtimin pa vonesë të aplikimit për statusin e vendit kandidat, do të kontribuojë drejtpërdrejt për një rajon më të qëndrueshëm dhe më të sigurt”, tha Hoxha, duke shtuar se kjo rikonfirmon perspektivën evropiane për të gjitha vendet e Ballkanit Perëndimor.
Vendimi për heqjen e masave u konfirmua nga Komisioni Evropian, i cili bëri të ditur se është liruar e gjithë ndihma financiare që ishte pezulluar më parë dhe se do të rifillojë angazhimi i plotë me institucionet e Kosovës.
Masat ndëshkuese ishin vendosur në vitin 2023 për shkak të tensioneve në veri të Kosovës, duke përfshirë pezullimin e fondeve dhe takimeve zyrtare, ndërsa situata politike gjatë vitit 2025 kishte sjellë edhe ngadalësim të reformave në vend.
