Pas miratimit të buxhetit nga mazhoranca, kreu i Partisë Demokratike hodhi akuza të rënda.
Sipas Lulzim Bashës, organizata kriminale e Rilindjes miratoi buxhetin më katastrofik të pluralizmit.
“Rama shënoi rritjen historike të çmimit të ujit dhe energjisë elektrike. Kjo është një frymë mbytëse për ekonominë dhe këto të vërteta nuk fshihen dot nga propaganda bajate e Edi Ramës” – tha Lulzim Basha ndër të tjera.
Sipas tij, taksa vendore në Tiranë është shtatëfishuar ndërsa tha se qeveria solli falimentin e biznesit të vogël.
“Kjo rritje galopante taksash që ka çuar në 1.9 mld euro më shumë të marra nga xhepat tuaja nuk ka sjellë asnjë rritje ekonomike, por e ka futur vendin në një cikël krize.
Nuk ka shembull më të trishtë për ta ilustruar këtë se sa përditësimi i fundit i shifrave të falimentimit të bizneseve.
Mbi 13 mijë biznese të mbyllura nga janari deri në tetor. 60% më shumë biznese kanë mbyllur qepenat këtë vit në krahasim me vitin e kaluar.
Mbi 73 mijë biznese të mbyllura që kur Rilindja ka ardhur në pushtet që prekin 150 mijë familje shqiptare. Ky është rezultat i drejtpërdrejt i frymës mbytëse për ekonominë që ka shkaktuar qeveria e Edi Ramës” – tha kreu i PD.
/A.Rada
