Historia e Agron Xhafajt, që është vëllai i ministrit të Brendshëm Fatmir Xhafaj prej gati dy javësh është duke dominuar opinionin publik. Kjo nisi kur tre zyrtarë të PD denoncuan një përgjim misterioz, që mbetet në rrethana të dyshimta si u realizua. Tre zyrtarët u thirrën sot nga Prokuroria e Krimeve të Rënda, ndërsa njëri prej tyre, ish-ministri teknik, eksperti i PD Gazmend Bardhi ishte i ftuar në emisionin ‘5 Pyetjet nga Babaramo’ në Report Tv. Ai u shpreh se në prokurori iu bënë 2-3 pyetje për përgjimin misterioz, qëndroi rreth 20 minuta, por shtoi se nuk mund të japë më shumë detaje, pasi nuk mund të nxjerr sekretin hetimor.
“Nuk mund të nxjerr sekretin hetimor për atë që dëshmova në prokurori. Më pyetën për ato që bëmë publike dhe faktet. Seanca zgjati rreth 20-30 minuta. Ishin 2-3 pyetje që lidheshin me materialin që u bënë publike, ne qëndrimin tonë e kemi publik. Personat që duhet të ishin sot në prokurori duhet të ishte Xhafaj dhe vëllai i tij. Unë nuk kam bërë krim, kam denoncuar një aferë ku janë përfshirë ministri i Brendshëm dhe vëllai i tij. Salianji qëndroi pak më gjatë, ndërsa Alibeaj sa unë. Prokurorë ishin, dy Gentian Osmani dhe Përparim Kulluri. Nuk besoj se ka arsye për të na rithirrur. Ne nuk kemi kryer përgjim, nuk është PD autorja e përgjimit, ka një deklaratë të atyre që e kanë realizuar”, deklaroi Bardhi.
Në deklaratat mes dëshmitarit ‘X’ dhe gazetarit Olldashi ka shumë kontradita, por Bardhi thotë se kjo ka ardhur nga gjendja e rënduar psikologjike e Albert Veliut, pasi shteti është ngritur në këmbë, ndërsa shton se përgjimi mund të jetë kryer edhe pa dijeninë e tij.
“Gazetari ka thënë se gjatë gjithë kohës që Veliu ka qenë i pajisur prej meje nga një përgjues. Dëshmitarin nuk e njoh personalisht. E kam parë rastësisht, nuk e njoh, as nuk dua ta njoh, edhe pse i ka kryer një shërbim opinionit publik. Nuk di ta them nëse ai e dallon një pajisje përgjimi. Përgjimi u bë pa vullnetin e tij? Nuk di ta them këtë. Gjendja e tij psikologjike duhet të jetë e rënduar, pasi ka denoncuar një rast trafiku dhe shteti është në këmbë për të mbrojtur Agron Xhafajn, prandaj duhet pasur parasysh edhe kjo kur analizojmë. Në dijeninë time dëshmitari ‘X’ nuk është marrë në mbrojtje”, tha ai më tej./a.m.
