Presidenti i Ligës spanjolle Havier Tebas ka vijuar t’i sulmojë dy gjigantët e futbollit në këtë vend, Realin e Madridit dhe Barcelonën.
Në fakt, ai e ka me dy emrat e përveçëm, Florentino Perez (Real Madrid) dhe Joan Laporta (Barcelona). Gjatë një interviste për “Cope”, numri një i Ligës ka fajësuar presidentin e Realit për Super Ligën, që e konsideron “të vdekur” dhe Laportën për largimin e Leo Mesit nga Barça.
FLORENTINO PEREZ – “Ka kohë që nuk shoh futboll në stadium. Përse nuk shkoj në Bernabeu për të parë Realin? Në fakt Florentino më fton në çdo ndeshje, por nuk kam çfarë të bëj me të në stadium, pasi nuk mund të qëndroj me dikë me të cilin nuk merrem vesh për asgjë”.
JOAN LAPORTA – “Me Laportën marrëdhëniet janë më ndryshe, shkëmbejmë mesazhe, por kam kohë që nuk jam takuar me të. Me Perezin është ndryshe, gjërat janë më të thella. Florentino nuk është Reali dhe mendoj se nuk bën për Realin”.
LARGIMI I MESIT – “Fajin gjejeni te Barcelona dhe te Laporta. E kam takuar Laportën dhe i kam kërkuar të firmosë me fondin e investimeve CVC, por nuk deshi. Ndoshta pas largimit të Mesit mund të qëndrojë edhe Florentino. Jam i bindur se nëse Barcelona do të kishte firmosur me CVC-në, Mesi do të ishte ende në La Liga”.
SUPER LIGA – “As nuk dua ta diskutoj këtë temë. Nuk mendoj se e ardhmja është te Super Liga. Në Angli e kuptuan shpejt se kjo ishte një ide shumë e gabuar. Në Gjermani ndodhi pak a shumë e njëjta histori. Për mua, Super Liga është një ide e vdekur”.
KAMPIONATI SPANJOLL – “Jam prej dy vitesh në detyrë dhe kam edhe pesë vite të tjera, por do të jenë klubet që do të vendosin. Tani kemi sfida të mëdha përpara. Nuk më shqetëson Super Liga, por idetë e çmendura të Perezit, që mendon se futbollin duhet ta komandojnë vetëm klubet e mëdha”.
LUFTA ME PEREZIN – “Vetëm ai është i bindur se Super Liga është një projekt që jeton. As Laporta dhe as Anjeli nuk besojnë. Jam i bindur se po të ketë mundësi më heq nga president i Ligës. Politika institucionale e Realit të Madridit është tërësisht e gabuar. Ky klub nëpërmjet presidentit të tij po bën shumë armiq”.
SITUATA TE BARÇA – “Mendoj se dy klubet e mëdha, Reali dhe Barcelona janë të shqetësuar për marrëveshjen që kemi me fondin CVC. Florentino e do Ligën të dobët që ta komandojë vetë. Barcelona është në një krizë të thellë, por mendoj se po e teprojmë shumë me këtë fakt, sepse ka klube të tjerë jashtë Spanjës që janë të fundosur edhe më keq”.
LIGA PA YJE – “Yje ka dhe një ndër ta është Karim Benzema. Bashkë me Halandin janë sulmuesit më të mirë në Europë”./panoramasport
g.kosovari
