Ministri i Mbrojtjes, Pirro Vengu, bëri të ditur se autoritetet janë drejt përfundimit të evakuimeve në zonat Ferras dhe Fitore, në të dy anët e grykëderdhjes së Vjosës, për shkak të rritjes së prurjeve të ujërave dhe reshjeve intensive.
Ai theksoi se prioritet u është dhënë familjeve me fëmijë, të moshuarve dhe personave me probleme shëndetësore, ndërsa Forcat e Armatosura vijojnë ndërhyrjet edhe në zona të tjera të rrezikuara në vend, në kushtet e parashikimeve për reshje dhe erë të fortë gjatë ditëve në vijim.
“Jemi duke përfunduar evakuimet në Ferras dhe në Fitore nga të dyja anët e grykëderdhjes së Vjosës. Evakuimi është shpallur që në orët e mëngjesit, por sigurisht që kemi pasur edhe refuzime të mirëkuptuara nga banorët. Kemi pasur përparësi nëna me fëmijë, persona të moshuar dhe me shëndet të rënduar. Kemi ende një familje me pesë anëtarë të cilët do të evakuohen në këto momente nga Forcat e Armatosura. Do të vazhdojmë evakuimet edhe nëpër zona të tjera përgjatë grykëderdhjes.
Kemi shpallur një përpjekje edhe në fshatin Bishan, sepse kemi një përparësi të ujërave edhe atje. Një pjesë e madhe është e evakuuar. Parashikojmë që prurjet të vijojnë, janë ende brenda argjinaturave, mund të menaxhohen kështu edhe tokat bujqësore. Sinoptikanët tanë të ushtrisë tregojnë që do të kemi reshje edhe në vijimësi gjatë ditës së shtunë. Jemi të angazhuar fuqimisht në Durrës edhe në Shkodër. Sikundër edhe në Gjirokastër, Delvinë dhe Përmet ku ka një prurje shumë të madhe të reshjeve, shumë vërshime dhe shembje urash. Prioritet mbetet jeta e banorëve, infrastrukturën dhe energjinë. Tre ditët që do të vijën do jenë me reshje dhe erë prandaj do jemi të gatshëm në terren”, tha ministri Vengu.
