Banorët e fshatit Gjorm, në Bashkinë Kurbin, dolën në protestë për shkak të përmbytjeve të vazhdueshme dhe dëmtimeve të shkaktuara në rrugë nga vërshimi i ujërave. Në shenjë indinjate ndaj mosveprimit të autoriteteve lokale dhe qendrore, ata bllokuan për disa minuta rrugën nacionale Laç-Mamurras, ku nuk munguan as përplasjet.
Sipas banorëve, përmbytjet e përsëritura shkaktohen nga mungesa e ndërhyrjeve në pastrimin dhe sistemimin e kanaleve kulluese, duke bërë që zona të përmbytet sa herë ka reshje të dendura shiu.
Në mbështetje të protestës ishte edhe deputeti i Partisë Demokratike, Kastriot Piroli, i cili u shpreh se Kurbinin e kanë lënë “në mëshirë të fatit” dhe se situata është e papranueshme për banorët.
Gjormi mbetet një nga zonat më të prekura nga përmbytjet në Bashkinë Kurbin. Brenda gjashtë javësh të fundit, përmbytjet kanë shkaktuar dëme materiale të shumta dhe vështirësi serioze për jetën e përditshme të banorëve.
