Të ardhurat nga shitja e naftës në periudhën janar-mars të Bankers Petroleum, kompania kryesore e nxjerrjes së naftës në Shqipëri, ranë në 33.1 milionë dollarë nga 71.4 milionë që qe në të njëjtën periudhë të vitit 2015.
Rënia me mbi 54 për qind e të ardhurave erdhi si pasojë e rënies së çmimit mesatar në naftës në tregun ndërkombëtar me 37 për qind dhe rënies së prodhimit të Bankers në Shqipëri me rreth 5 për qind.
“Tremujori i parë ishte sfidues për kompaninë. Ne kemi operuar në tregje të paqëndrueshme dhe konkuruese të naftës së rëndë,” deklaroi Ekzekutiv i kompanisë David French, sipas një deklarate të kompanisë që u shpërnda për investitorët dhe median sot (5 maj 2016).
Çmimi referencë Brent i bursës së Londrës qe më pak se 34 dollarë për fuçi në tremujorin e parë 2016 nga 54 dollarë për fuçi që qe një vit më parë.
Kompania ka ndërprerë investimet për shpime të reja që nga dhjetori i kaluar, gjë që dha efekt menjëherë në rënien e prodhimit.
“Gjatë tremujorit të parë të vitit 2016, shpenzimet kapitale ishin 13 milionë Dollarë. Kompania nuk ka shpoi asnjë pus të ri gjatë këtij tremujori. Shpenzimet kapitale ishin 25 milion Dollarë për tremujorin e kaluar dhe 50 Milionë Dollarë në tremujorin e parë të vitit 2015,” deklaroi kompania.
Prodhimi mesatar ditor ra në 17,363 fuçi këtë vit, nga 19,767 fuçi që qe vitin e kaluar. Një fuçi naftë është e barabartë me rreth 160 litra.
Prodhimi i naftës në Shqipëri shënoi pikën më të lartë në vitin 1974 në rreth 2.3 milionë tonë, por ra me shpejtësi gjatë viteve në vijim duke shënuar pikën më të ulët në fillim të viteve 2000 me më pak se 400 mijë tonë. Në vitin 2005, prodhimi i naftës filloi të rritet sërish përmes kontratave koncesionare duke shënuar kulmin në vitin 2014 me rreth 1.4 milionë tonë. Në vitin 2015, prodhimi ra në 1.28 milionë tonë ndërsa këtë vit pritet të bjerë edhe me 20 për qind nga niveli i vitit të kaluar si pasojë e mungesës së investimeve dhe çmimit shumë të ulët.
BIRN/d.i.
