Bankers në përfundim të pastrimit dhe rehabilitimit të zonës së çlirimit të gazit në Marinzë
Kompania Bankers Petroleum në një deklaratë për mediat ka bërë me dije se kompensimi i banorëve, pastrimi dhe rehabilitimi i zonës së prekur nga çlirimi i gazit në 1 Prill 2015, është pranë përfundimit.
Gjatë këtyre muajve Bankers ka punuar me përkushtim dhe tashmë është drejt përfundimit të procesit të pastrimit dhe rehabilitimit të zonës përreth çlirimit të gazit. Rrugët publike janë riparuar, mbi 2,000 kanale kullimi janë pastruar dhe ristrukturuar. Bankers ka pastruar gjithashtu 8,000 m2 tokë bujqësore.
Më tej Bankers ka theksuar se do të vijojë të jetë prezent, duke përfunduar çdo punë rehabilituese dhe duke monitoruar me kujdes zonën.
Në 21 Maj, 2015 kompania publikoi rezultatet e një vlerësimi mjedisor i cili konfirmoi se ajri, toka dhe uji përreth Marinzës nuk ishin prekur nga çlirimi i gazit. Si pjesë e vijueshmërisë së procesit të kompensimit dhe angazhimit në zonën e Marinzës, kompania do të vazhdojë të furnizojë me ujë zonat e prekura deri në 31 Dhjetor 2015 dhe me ujë të pijshëm deri në 20 Shtator 2015.
Sipas tyre ky progres është bërë i mundur falë bashkëpunimit të mirë me qeverisjen lokale dhe qendrore dhe dialogut konstruktiv me pjesëtarët e komunitetit të prekur.
