Banka e Shqipërisë bën të ditur se bonot e thesarit me maturim 12 dhe 6-mujor u emetuan në ankandin e fundit me një interes mesatar të ponderuar në rënie kundrejt ankandit të mëparshëm, përkatësisht në vlerën e 1.67% dhe 1.26%.
Sipas BSH-së, kjo situatë është rezultat i gjendjes shumë likuide të sistemit financiar, por edhe i uljes së ndjeshme të kërkesës për financim nga qeveria shqiptare gjatë muajve të fundit.
Në ankand u shitën 14.3 miliardë lekë bono thesari.
Banka e Shqipërisë parashikon që kjo gjendje e tregut do të vijojë të diktojë nivele të ulëta të interesave edhe përgjatë vitit 2016.
