Policia e Shtetit së bashku me Prokurorinë finalizuan një super-operacion në kuadër të të cilit u shkatërrua një prej bandave më të rrezikshme që vepronte në Shkodër dhe jashtë vendit. Të paktën 11 persona, anëtarë të bandës “Bajri”, janë vënë në pranga në Shkodër, Tiranë dhe Holandë.
Por, si u ra në gjurmët e këtyre personave? Zv.ministri i Brendshëm Besfort Lamallari deklaroi në emiisonin “Kjo Javë” në News 24 se këta shtetas ishin nëndkeje prej kohësh. Ai tha se ky grup ishte skeduar nga task-forca dhe për muaj më radhë personat e arrestuar u survejuan për të siguruar prova për aktivitetin e tyre kriminal.
“Anëtarët e bandës janë ndjekur për muaj me radhë. Janë bërë përgjime ambjentale, në platforma të ndryshme komunikimi. Janë përdorur edhe dronë për të monitoruar lëvizjet e tyre”, deklaroi Lamallari.
Ai tha se “ky ishte një operacion 100 % i Shqipërisë. Ka pasur edhe bashkëpunim me palën holandeze”.
Lamallari deklaroi se janë siguruar prova të mjaftueshme për krimet e bandës ku veçoi dy vrasje të ndodhura në vitet 2001-2002 por edhe krime të tjera në kohët e fundit.
“Familjet e atyre viktimave sot janë më të qetë”, tha Lamallari i cili shtoi se janë siguruar prova të pakontestueshme për të “fundosur” të arrestuarit.
Ai tha se për skedimin e bandës janë studiuar edhe vendimet e gjykatave për krimet e tyre. Sipas Lamallarit, ata perosna ia kanë hedhur me dënime qesharake apo janë liruar për krime të rënda.
“Edhe vendimet e gjykatave janë të papranueshme. 2 vite burg për vrasje, apo tre vite burg për vrasje”, tha ai.
Lidhur me krimet e fundit të ndodhura në Shkodër, zv.ministri u tregua i kujdesshëm me përfundimet, por tha se po hetohet ende për të kuptuar nëse banda ka dorë. Ai tha se banda ka bashkëpunuar edhe me grupe të tjera në trafik droge, gjobëvënie e transport armësh etj./a.m.
