Rrethimi i qyteteve siriane është një krim lufte, deklaroi sot sekretari i përgjithshëm i OKB-së, Ban Ki moon, një ditë para një mbledhje të Këshillit të Sigurimit të kërkuar nga Parisi, Londra dhe Uashingtoni.
Duke folur për fatin e Madayas dhe të qyteteve të tjera të rrethuara nga palët luftuese në Siri, Ban Ki moon deklaroi për median se “përdorimi i urisë si armë në luftë është një krim lufte”.
Ai theksoi se “si regjimi edhe opozita e armatosur duhet të dënohen për këtë dhe shumë krime që ndalohen nga ligjet humanitare ndërkombëtare”.
Ai kërkoi gjithashtu që “vendet e rajonit dhe përtej që mund të kenë influencë të bëjnë presion mbi palët për të siguruar një akses humanitar të lirë dhe të qëndrueshëm në të gjithë Sirinë”.
Kjo është hera e parë që OKB-ja shprehet kaq hapur dhe në nivelin më të lartë, ndërkohë që karvanet humanitare arritën në Madaya dhe dy qytete të tjera të rrethuara prej dy muajsh.
