Nga Raimond Cimbi
Të martën në mbrëmje po ndiqja një emision televiziv, i cili nga moderatori konsiderohet dhe titullohet …SHOW, thjesht për faktin se të ftuarit presin radhën si në berberhane për t`u intervistuar tête-à-tetê prej tij.
Në një moment, radha i erdhi një ish-ministri, i cili sytë e zgurdulluar i nguli në ekran, duke na u drejtuar plot solemnitet ne shqiptarëve, a thua se kish bërë zbulimin e shekullit: “Ti shqiptari im, kujtohu që ke në xhep një pasaportë që lëviz lirisht për shkak të Berishës… të paktën t’i jesh mirënjohës për lëvizjen e lirë”.
I zgurdullova sytë më shumë se ish ministri. Si ka mundësi që në Shqipëri, 30 vjet mbas shembjes së Komunizmit, detyrat shtetërore, të çfarëdo rëndësie qofshin, i atribuohen nominalisht një Kryeministri që përkon në detyrë?
M’u kujtuan shprehje të tjera, të konsumuara nëpër ekranet televizive nga ithtarë kryeministrorë: Berisha na futi në NATO, Berisha na bëri Rrugën e Kombit…
Domethënë me pak fjalë, ky Berisha, nuk është se thjesht paska bërë detyrën për të cilën është mandatuar, por nga dashuria e madhe për shqiptarët na paska bërë ca dhurata, për të cilat ne shqiptarët duhet t`i jemi mirënjohës, pasi përndryshe rrezikojmë të jemi edhe bukëshkalë.
Këtu ish ministri përmbysi kodin moral të shoqërive demokratike dhe unë i them publikisht: është e kundërta zoti ish ministër! Është Kryeministri i cili duhet t`i jetë mirënjohës popullit të vet, që nëpërmjet votës i dha atë ofiq të lartë.
Sigurisht që ish-ministri nuk shkau në artikulimin e një deklarate të tillë zgurdulluese. Ai foli “i mbrujtur” nga e kaluara komuniste, ku veprat identifikoheshin me despotët. Duke konsideruar që ish ministri është relativisht i ri në moshë, që ka shijuar me tepri të mirat dhe përfitimet e sistemit demokratik, madje si një ofiqar i tij, që në fund të fundit monizmi ka 30 vjet që është përmbysur, mendova: sa të thella i paska pasur rrënjët ky Komunizmi!
Edhe sa vjet apo dekada do të duhen që shoqëria shqiptare të pastrohet nga fanatikë apo shërbëtorë të tillë?
Unë jam i sigurt se një italian që udhëton me makinën e tij në “Autostrada Del Sole” (arteria më kryesore e Gadishullit Apenin) as nuk e ka idenë që ajo është ndërtuar në kohën kur kryeministër i Italisë ishte Aldo Moro, dhe as i shkon ndërmend që t’i jetë atij mirënjohës. Jam po aq i sigurt se një grek nuk i “falet” kryeministrit Kostas Karamanlis kur kalon me veturën e tij në urën e famshme dhe më moderne të Greqisë, Rio – Antirrio, dhe sigurisht nuk është bukëshkalë.
Kryeministrat bëjnë detyrën dhe ikin, madje shpejt, veprat mbeten!
