Balluku prezanton ligjin për biokarburantet: Përafrohemi akoma më shumë me kërkesat e BE-së

Zv/kryeministrja, njëherazi ministre e Infrastrukturës dhe Energjisë, Belinda Balluku, prezantoi të enjten e 26 qershorit, projektligjin për përdorimin e biokarburanteve dhe të lëndëve të tjera djegëse, të rinovueshme për transport.

“Sot duke hedhur një hap të ri, me miratimin e këtij projektligji ne do të përafrohemi akoma dhe më shumë, të gjithë kërkesave dhe angazhimeve që kemi marrë në procesin e negocimit për anëtarësimin në BE”, tha Balluku nga foltorja.

Sipas saj, ky projektligj përcakton sasinë minimale vjetore në treg të biokarburanteve dhe lëndëve të tjera të rinovueshme për transport, të cilat plotësojnë kriteret e qëndrueshmërisë dhe kriteret e emetimeve të gazit serrë për biokarburantet.

“Që duhet të jenë jo më pak se 1% e sasisë së konsumit përfundimtar të lëndëve djegëse në sektorin e transportit duke filluar nga viti 2026 me synimin që të rritet 1% çdo vit, duke arritur kështu një 7% të volumit në fund të vitit 2030”, tha Balluku.

Balluku tha se përdorimi i energjisë së rinovueshme kërkon mbështetje dhe edukim të të gjithë përdoruesve.

Në projektligj është përfshirë edhe parashikimi i incentivimit të përdorimit të biokarburanteve nëpërmjet masave fiskale lehtësuese, praktikë kjo e ndjekur edhe nga vende të tjera të BE-së. Balluku mori si shembullin më të mirë Gjermanisë, ku theksoi se impakti fundor i përfshirjes së biokarburanteve në lëndët djegëse për transport të mos sjellë rritje të çmimit.

“Ky ligj do të shoqërohet edhe me një paketë aktesh nënligjore të cilat do të rregullojnë edhe mekanizmat monitorues dhe kontrollues të aplikimit të detyrimit të përfshirjes së biokarburantit si dhe mekanizmat për licencimin e veprimtarive të reja të prodhimit dhe përzgjedhjes së biokarburanteve”, tha Balluku.

Sipas Ballukut me projektligjin e ri është forcuar koncepti i përllogaritjes në tre fusha të ndryshme të energjive të prodhuara nga burimet e rinovueshme.

“Ai i konsumit të energjisë elektrike të prodhuara nga burime të rinovueshme, ai i konsumit të energjive të rinovueshme për ngrohje dhe ftohje, konsumi i energjisë nga sektori i transportit i prodhuar nga burimet e rinovueshme. Aktualisht dy fushat e para janë rregulluar nëpërmjet ligjit 24 të 2023 për promovimin e përdorimit të energjisë së rinovueshme”, tha zv/kryeministrja.

Balluku tha se objektiv i ligjit, përveç arritjes për uljen emetimeve të gazit serrë, janë edhe mundësitë e zhvillimit të aktiviteteve tregtare në prodhimin e biokarburanteve dhe krijimi i një sektori të ri, i cili ndërlidh sektorin bujqësor me atë të energjisë së rinovueshme.

Ndër të tjera ajo theksoi ky projektligj është pjesë e akteve që synojnë përafrimin e legjislacionit vendas me paketën europiane për klimën, sikurse është ligji për performancën energjetike të ndërtesave, ligji për sektorin e energjisë që do të përcillet së shpejti në komisionet parlamentare apo edhe ligji për eficencën e energjisë.

Balluku i bëri thirrje deputetëve ta votojnë këtë ligj.