Ballkani po bëhet një zonë ndikimi për Rusinë dhe Kinën. Javën e kaluar Beogradi, megjithë rezervat e Brukselit, nënshkroi një marrëveshje të tregtisë së lirë me Bashkimin Ekonomik Euroaziatik (EAEU) të krijuar nga Rusia.
Duke folur për Euronews, Brnabic tha se diskutimet mbi ndikimin e Kinës dhe Rusisë janë të tepruara dhe se 90% e të gjithë investimeve kineze janë në Europën Perëndimore:
“Gjëja e rëndësishme për ne është të kemi partneritete në të gjithë botën. Në këtë dritë, unë do të shoh marrëveshjen e tregtisë së lirë që kemi nënshkruar të premten e kaluar me Bashkimin Ekonomik Euroaziatik në Moskë. Nuk e konsideroj se është kundër anëtarësimit tonë në BE ose kundër kursit tonë evropian. Përkundrazi, unë e shoh atë si plotësuese. Unë gjithashtu besoj se diskutimet mbi ndikimin e Kinës dhe Rusisë janë të tepëruara. Ne jemi kritikë ndaj investimeve kineze në Serbi, por nëse shohim të dhënat 90% e të gjithë investimeve kineze në Europë janë në Europën Perëndimore”.
Ana Brnabic ka paralajmëruar një efekt zinxhir në Ballkan pas vendimit të Bashkimit Evropian për të mbajtur dyert e mbyllura për Shqipërinë dhe Maqedoninë e Veriut. Ajo pranoi se konfliktet e brendshme europiane po ndikojnë në Ballkan dhe perspektivën e tyre evropiane:
“Më duhet të pranoj se procesi i pranimit është shpesh shumë i dhimbshëm dhe zhgënjyes dhe varet nga sfidat e brendshme të Bashkimit Evropian. Mosfillimi i negociatave me Maqedoninë e Veriut dhe Shqipërinë, besoj, do të thotë herën tjetër që Bashkimi Europian do të vendosë të hapë kapituj për Serbinë, do të jetë në numër shumë konservator, pavarësisht reformave që po kryhen në Serbi”.
