Pas 9 minutash ankthi shtesë, Ballkani i Ilir Dajës bën mrekullinë në Conference League, duke mundur në Turqi Sivasporin me rezultatin 3-4, në një ndeshje të çmendur plot përmbysje, dhe e vendosur në sekondat e fundit.
Gjërat për kosovarët kishin filluar në mënyrën më të keqe, me turqit që kalojnë në avantazh në minutën e parë me anë të Ulvestad.
Por djemtë kosovarë fillojnë lojën e tyre sikur asgjë të kishte ndodhur, dhe fillojnë të dhurojnë spektakël në stadiumin “Sivas 4 Eylül”.
Eshte kapiteni i tyre Thaqi që realizon në minutën 20 me një gjuajtje të papritur nga larg, ndërkohë që 11 minuta më vonë kosovarët kalojnë në avantazh falë një aksioni të bukur të finalizuar nga Potoku.
Në pjesën e dytë, fitorja e parë e Ballkanit në grupet e turneut europian duket e shkruar kur ato realizojnë golin e tretë në minutën 66, me një tjetër perlë të shënuar nga një aksion personal të Korenicës. Por emocionet nuk mbarojnë këtu.
Turqit ngushtojnë fillimisht rezultatin me Jesiljurt (76’) dhe në minutën e parë shtesë pas një periudhe presioni gjejnë barazimin me anë të Jatabare.
Diçka që do të priste hovin e çdo ekipi, por Ballkani ka forcën në minutën 94 për të përmbysur gjithçka me një kundërsulm që gjen mbrojtjen turke të papërgatitur.
Me këtë fitore, Ballkani mban ende gjallë shpresat për kualifikim, duke u ngjitur ne kuotën e 4 pikëve, momentalisht e dyta në grupin G.
/a.r
