Balla “thumbon” opozitën për Avokatin e Popullit: Ndeshja në minutën e 90, s’ka minuta shtesë! Ligji është strikt

Një nga çështjet e nxehta të parlamentit mbetet zgjedhja e Avokatit të Popullit. Sipas kryetarit të grupit parlamentar të Partisë Socialiste, Taulant Balla, i cili bëri një paralelizëm me ndeshjen e futbollit, procedura për zgjedhjen e kreut të ri të këtij institucioni ka shkuar deri në minutën e 90, por nuk ka minuta shtesë. Kjo për arsye se duhet të zbatohet procedura dhe nga ky moment është vetëm Kuvendi që do të shprehet me votë.

“Në Komisionin e Ligjeve është thënë që do zbatohet procedura e ligjit. Ligji është zgjedhja që tejkalon marrëveshjen në kuptimin që natyrshëm mund të bësh marrëveshje, por ligji është procedura. Procedura ka ecur deri në minutën 90. Sot që flasim jemi në minutën e 90 të një ndeshje futbolli. Nuk ka shtesë. Arsyeja është shumë e thjeshtë. Nga ky moment është vetëm Kuvendi, seanca që mund të shprehet me votë. E vetmja që vendos nga sot është seanca”, tha Balla.

Ai akuzoi Partinë Demokratike duke theksuar se po përpiqen mos ta zgjedhin Avokatin e ri të Popullit, por duan të lenë në detyrë kryetaren aktuale, Erinda Ballanca. Ai mohoi që firmat e Partisë Demokratike të jenë tërhequr nga kandidaturat.

“Ligji është shumë strikt. Fazat janë djegur. Nuk mund të tërhiqen firmat sot. Nëse do tërhiqeshin, mund të tërhiqeshin dje”, tha ai.

Sipas Ballës, Partia Socialiste është e interesuar që të ketë një Avokat të ri Populli dhe kjo të realizohet në respekt të traditës parlamentare, pra emri duhet të vijë nga opozita. Kjo është arsyeja sipas tij, pse Partia Socialiste nuk ka propozuar një kandidaturë. Sa i përket emrave që janë propozuar, ai tha se mazhoranca do ta vendosë se kë do të mbështesë në datën 9 dhjetor teksa votimi është parashikuar në seancë plenare më 11 dhjetor.

“Në ditën e parë të fillimit të këtij procesi i kam kërkuar grupit parlamentar që asnjë deputet i PS-së të mos mbështesë me firmë asnjë kandidat për arsyen se nuk na takon ne të mbështesim me firma një kandidat dhe vlerësojmë që duhet të vijë nga opozita në respekt jo të normës së ligjit, por të normës së traditës parlamentare. Kam qenë i gatshëm tre vite e kusur të bëjmë një marrëveshje për këtë ndoshta e ngjashme si ajo e 17 majit dhe nuk ka pasur gatishmëri për këtë. E kam thënë në grup që të mbyllet ky proces pa firmën e asnjërit. Pasi ne të shohim kush janë ata që kanë ardhur si propozime të opozitës, me firma nga deputetët e opozitës pasi asnjë nga palët e opozitës nuk ka ekskluzivitetin e opozitës. Ditën e martë do të rimbledhim grupin parlamentar për të diskutuar mbi një nga kandidaturat. Të martën në datën 9 sepse më datë 11 është planifikuar të jetë votimi”, tha Balla.

Ai theksoi se në Kuvend ka forca të tjera politike në opozitë përveç Partisë Demokratike që nuk do ta bojkotojë procesin. Kujtojmë se për zgjedhjen e tij duhen 84 vota. Mazhoranca ka 83.

“Besoj që kuvendi ka edhe forca të tjera politike që nuk do bojkotojnë procesin”, tha Balla.

Kreu i grupit parlamentar shprehu mendimin se Avokati i ri i Popullit duhet të mos jetë një personalitet në fushën e të drejtës që të jetë i lidhur në një moment të caktuar me Partinë Socialiste.

“Këto kandidatura nuk i kam zgjedhur unë. Unë jam i detyruar të zgjedh njërën nga këta shtatë. Nuk është zgjedhja ime, por nuk mund ta mbaj dot peng institucionin”, tha ai.

Balla mohoi në “Opinion” që dikush brenda Partisë Socialiste të ketë deklaruar publikisht që do të mbështesin Endri Shabanin.

“Di që dje publikisht kam deklaruar ë përmbyllje të procesit të depozitimit të kandidaturaveë se PS nuk do mbështesë me firma një kandidat të vetin që është procedura që kërkon ligji”, tha ai.