Nënkryetari i grupit parlamentar të PS-së, deputeti Taulant Balla tha se formulari i vetëdeklarimit të demokratit Flamur Noka ka shkelje ligjore, pasi ai ka qenë i dënuar e më pas dëbuar nga ish Jugosllavia në vitin 91’. Balla ka sqaruar se Flamur Noka ka kryer veprën penale të falsifikimit të dokumentave, siç është ai i formularit të vetëdeklarimit, teksa ka kërkuar nga Prokuroria e Përgjithshme, nisjen e hetimit për këtë çështje.
“Në pikën 5 dhe 7 të formularit nuk ka deklaruar të dhëna të rëndësishme për ndalimin dhe dhënien e masës së sigurisë nga një shtet i huaj… bëhet fjalë për ish Jugosllavinë. Duhet që prokuroria të fillojë menjëherë verifikimin dhe hetimin “kryesisht”. Kjo është një procedurë që ne do ta ndjekim edhe për disa raste të tjera të përfaqësuesëve të Partisë Demokratike…. Pika 7 e dokumentit të vetëdeklarimit është shumë e qartë, a jeni dëbuar ndonjëherë nga një shtet i huaj… pra, ti e ke detyrim që ta thuash atë dhe mosdeklarimi i saj është vepër penale, sepse është falsifikim!”– tha Balla.
Balla ka shtuar gjithashtu se një rast tjetër flagrant, është ai i Sali Berishës, i cili ka ndryshuar ditën e lindjes, madje duke bërë edhe presion përmes punonjësve të tij në zyrën e gjëndjes civile.
“Rasti më flagrant është i deputetit Sali Berisha, ku në pikën dy ka fshehur një gjeneralitet të përdorur në pjesën më të madhe të jetës së tij, bëhet fjalë për datëlindjen… deri në 2009 ka qenë 1 korrik 44′ dhe pas 2009 mban një gjeneralitet tjetër 5 tetor 44’. Kemi të bëjmë me një shkelje të hapur të ligjit nga verifikimi që kemi bërë, në zyrën civile nr 2 në Tiranë.. është paraqitur një punonjës i sigurisë së Berishës dhe i ka bërë presion punonjësit të zyrës civile duke i kërkuar që të ndryshojë datën e lindjes si ajo që ishte në pasaportën diplomatike… Falsifikimi i dokumentave sic e dini është krim dhe dënohet deri në 6 vjet burgim.”- tha Balla. java/ a.k
