Kryetari i grupit parlamentar të Partisë Socialiste, Taulant Balla, gjatë seancës së fundit në Kuvend, më 27 tetor, theksoi diferencën e madhe mes sjelljes së opozitës dhe deputetëve të PS-së.
Balla deklaroi se asnjë deputet socialist nuk ka mbrojtur persona që hetohen nga drejtësia dhe kritikoi deputetët e opozitës për qëndrimet e tyre në Parlament.
“Ja dhe ky raportim mbaroi dhe me të drejtë dinë të bëjnë dallimin e madh dhe këtu besoj se ju nuk keni ndonjë shans për të reflektuar. Një qytetar i paanshëm që e ndoqi këtë seancë e pa shumë qartë se, për fatin e keq të opozitës në Shqipëri, ajo që ka mbetur nga PD vazhdon të udhëhiqet vetëm nga hallet e PD. I dëgjuat. Njëri këtu tha tre udhëheqësit e opozitës: Sali Berisha, Jamarbër Malltezi dhe Ilir Meta. Nuk e dija që Jamarbër Malltezi ishte udhëheqës i opozitës.
Këtu do doja ta kisha përballë, por mosha e vjetër ia fal mungesën në këtë orë të seancës. E kam dëgjuar shpesh që vjen këtu dhe valëvit disa thashetheme, që as nuk kam arritur t’i njoh dhe paskan thënë jo kështu e jo ashtu.
Por kur tha se i ka shkruar një… Ky raportim sot dëshmoi diferencën e madhe mes nesh. Në asnjë prej rasteve, asnjë deputet i PS-së nuk iu referua një dosjeje, edhe pse me të drejtë mund të kemi çështje për të ngritur, por rregulli brenda nesh është i qartë. Ne nuk bëjmë avokatin e askujt brenda familjes sonë politike, që hetohet, ndalohet, arrestohet nga drejtësia, edhe kur ne nuk na duket e drejtë. Ndërsa në rastin tuaj u rrekët të tregoni shumica prej jush se kush e do më shumë udhëheqësin, duke harruar se interesi i Shqipërisë sot është të mbështesni këto institucione të drejtësisë”, tha Balla.
