Kreu i grupit parlamentar të PS-së, Taulant Balla ka folur këtë të hënë për mediat për protestën studentore, që tanimë i është futur ditës së 14. Balla u shpreh se qëndrimi i qeverisë vazhdon të qëndrojë i njëjti, duke theksuar më tej se dialogu midis saj dhe studentëve duhet të shkojë përtej tetë pikave të parashtruara. Balla tha se qeveria nuk do të bëhet pjesë e skenarit të opozitës dhe e cilësoi seancën plenare të së enjtes së kaluar si një skenar ku kërkesat e studentëve u vendosën në lojë.
“Tetë pikat nuk e zgjidhin situatën e Arsimit të Lartë. Në protestë nuk janë vetëm studentë sepse pashë 3 punonjës të Bashkisë Kamëz… Rëndësi ka vetëm dialogu midis qeverisë dhe studentëve dhe ne kemi dhënë modelin më të mirë të enjtjen e të premten. U bëj thirrje të gjithë studentëve anembanë vendit që të vijnë në sallën e Kuvendit të Shqipërisë ballë për ballë me Kryeministrin”, u shpreh Balla.
I pyetur për Ligjin e Arsimit të Lartë, Balla tha se ndonëse implementimi i tij nuk është në tërësi dhe thellësi kjo nuk e hedh poshtë rëndësinë e autonominë të universiteteve publike. Balla ritheksoi se krahas tetë pikave, studentët dhe qeveria duhet të ballafaqohen në Kuvend edhe për cështje të tjera të rëndësishme që ndikojnë drejtpërdrejtë Arsimin e Lartë në vend.
I pyetur edhe për kthimin mbrapsht të dekretit për Buxhetin 2019, deputeti socialist u shpreh: Është e paparë dhe e padëgjuar që presidenti të kthejë buxhetin. Kjo ska lidhje me studentët, edhe vet presidenti e di këtë gjë por unë nuk di ta shpjegoj këtë vendim. Sa i takon kandidaturës dhe prezencës së Vitore Tushës në Këshillin e Emërimit në Drejtësi, Balla u shpreh se qeveria e vlerëson praninë e saj në KED./a.meta
