Gjykata e Apelit ka dënuar deputetin e PS Taulant Balla për shpifje ndaj Shkëlzen Berishës, djali i ish-kryeministrit Sali Berisha. Lajmi është bërë i ditur nga vetë Shkëlzen Berisha i cili përmes një postimi në rrjetin e tij social e ka përshëndetur këtë vendim.
Madje ai ka shkuar edhe më tej duke ironizuar dhe deklaratën e kryeministrit Edi Rama të dhënë mënjëherë pas dënimit të Edi Palokës dhe Arben Ristanit. Rama në deklaratën e tij kërkoi dënimin me burg për shpifësit, duke dalë kundër direktivate të Këshillit të Europës në lidhje me të drejtën e fjalës.
Ja statusi i plotë i Shkëlzen Berishës:
Gjykata e Apelit denon Taulant Ballen per shpifje ndaj meje. E pershendesim kete vendim me deklaraten e pershatur te padronit te tij bere para disa ditesh. Dënimi sot nga Gjykata e Apelit i nje shpifësi profesionist i cili, për shkak të aftësisë së tij të spikatur profesionale në fushën e shpifjes, eshte zgjedhur si sekretar i grupit parlamentar te PS eshte nje lajm i mire per tre aresye: Së pari, sepse opinioni publik mësoi nga një palë e tretë, pra nga Gjykata e Apelit, që akuzat e bëra ndaj meje nga këta zanatçinj të baltës politike, për medemek lidhje me Austria Lottery, janë shpifje dhe asgjë tjetër. Së dyti, sepse kjo lojë e ulët që e ka bërë shpesh politikën një neveri të vërtetë dhe i ka kthyer rëndom politikanët në lolo në syte e qytetarëve, nga sot nuk është më e pandëshkueshme. Kush shpif si i denuari i sotëm, duhet të llogarisë mirë përballjen me ligjin. Dhe së treti, denimi i sotshem eshte një lajm i mirë sepse nxjerrin edhe më qartë në pah nevojën për kriminalizimin e shpifjes si mjet lufte politike. Kjo e fundit do të thotë që speciet politike të cilat ushqehen duke shpifur për të tjerët dhe madje arrijnë të ngjiten deri në tempullin e parlamentit, nuk mjafton të shpallen fajtorë thjesht për kundravajtje penale kur shpifin; ato duhet të dënohen për krimin penal të shpifjes, siç ndodh në vende shumë më të zhvilluara se Shqipëria. Prandaj, kjo betejë nuk mbaron sot dhe nuk mbaron me këto gjyq. Sepse kjo nuk është nje betejë ligjore me nje shkretan që jeton me përsheshin e politikës së llojit më të ulët, por është një betejë kulturore kundër vetë politikës së këtij lloji! E cila ka ndotur si mos më keq çdo rrugë të komunikimit publik e qytetar në Shqipëri për 25 vjet rresht dhe është bërë shembulli më i turpshëm i komunikimit për rininë e këtij vendi. P.S Rama ruan te drejten e autorit per kete postim.
