Drejtuesve të skuadrës turke, Balikesirspor, u është sosur durimi me mesfushorin kosovar Valdet Rama. Skuadra turke e Ligës së Parë ka hequr dorë përfundimisht nga transferimi i Ramës. Bordi i klubit ka rreth një muaj që është duke bërë përpjekje ta bindë Ramën.
Madje edhe i është ruajtur fanella me numrin 10, ashtu siç kishte kërkuar vetë Rama gjatë negociatave. Por, siç thuhet në një letër të Bordit të skuadrës turke, Rama nuk ka qenë korrekt, duke i ndërruar vazhdimisht datat e takimeve.
Zyrtarët e klubit turk kanë akuzuar edhe gruan e lojtarit, duke thënë se ajo nuk ishte e gatshme të vazhdonte jetën në Turqi, përcjell Koha Ditore. Presidenti i klubit, Feyyaz Çiftçi, ka thënë se më nuk do të pritet Rama.
“Rama donte vazhdimisht kohë shtesë për të menduar. Në takimin tonë të fundit ai na tha të takohemi në muajin gusht, por ne e kemi mbyllur këtë histori, pasi nuk kemi shumë kohë të presim.
Ne duhet t’i bëjmë sa më parë planet e skuadrës. Ne kemi vendosur që të kërkojmë në treg një lojtar të ngjashëm me Valdet Ramën. Tani në kosultim me Bordin ne kemi vendosur që t’ia japim edhe numrin 10 ndonjë lojtari”, ka thënë Çiftçi për “haberturk.com”.
Përfaqësuesi i Shqipërisë së fundi ka qenë pjesë e Muenchen 1860. Karrierë ka bërë edhe në Real Valladolid, Hannover, Orebro, Ingolstadt dhe te të rinjtë e Wolfsburgut dhe Essenit. (b.an)
