Gjykata e Tiranës ka vendosur të dënojë me 5 vite burg një 45-vjeçar, i cili akuzohet se ka ushtruar dhunë në familje. Jo vetëm kaq, por B.P. ka ngacmuar seksualisht edhe dy vajzat e tij. Padia ndaj tij është bërë nga e shoqja, e cila thotë se është dhunuar nga bashkëshorti. Sipas gazetës Panorama, çifti janë martuar në vitin 1995.
Pasi kanë emigruar për disa vite në një vend fqinj, ata janë kthyer në Tiranë, ku ka nisur edhe kalvari i vuajtjeve për bashkëshorten A. Ajo thotë se ai e ka dhunuar në disa raste në sy të tre fëmijëve, dy vajza dhe një djalë, dy prej tyre të mitur. Por tronditës është fakti se babai ka ngacmuar seksualisht vajzat. Një prej viktimave, shtetësja M. thotë se babai e ka prekur në vende intime në janar të vitit të shkuar.
“Po ashtu në një rast tjetër, të po këtij muaji, kur kanë qenë të gjithë anëtarët e familjes, ajo ka qenë e shtrirë në divan duke luajtur me telefonin e saj, kur babai ka dalë nga dhoma e tij e gjumit, i është afruar dhe i ka thënë: Shtyhu se do të flemë bashkë. Ajo i është përgjigjur: Ti ke vendin tënd për të fjetur, ndaj mos më bëj të keqkuptohem”.
Babai e ka dhunuar edhe fizikisht.
“Po ashtu, në raste të tjera, kur ajo futej në dush, babai futej brenda dhe i thoshte: Nuk ka problem se jam babai yt dhe mund të të shoh”.
Kurse vajza tjetër e tij, A., thotë se babai e ngacmon prej gjashtë muajsh, ndërsa ushtron dhunë fizike. Edhe asaj ka tentuar t’i futet në dush, por ajo ia ka mbyllur derën me forcë. Vajzat thonë se kanë ndërhyrë në një rast për të mbrojtur mamanë e tyre, që po dhunohej nga babai. Ai i ka kërcënuar edhe në FB. Njërës vajzë i shkroi: “Po të hodha në dorë, do të të mbys si kec”. Për shkak të gjykimit të shkurtuar, ai do vuajë 3 vjet e 4 muaj burg./a.m.
