Numri i qytetarëve nga Shqipëria që aplikojnë për azil në Holandë është rritur ndjeshëm që prej verës së kaluar, duke u bërë grupi më i madh.
Rreth 250 shqiptarë kanë aplikuar për statusin e azilit çdo muaj, thotë ministri i Sigurisë dhe Drejtësisë për televizionin NOS.
Në vitin 2014, vetëm pak shqiptarë shkuan për azil në këtë vend. Ndërsa në vitin 2015, numri arriti në 1 010 kërkesa.
Kurse vetëm në dy muajt e parë të këtij viti, 480 shqiptarë kanë kërkuar azil në këtë vend. Që nga data 14 mars, janë 1 074 që po qëndrojnë në qendra e azilantëve në pritje të përgjigjes.
Kjo i bën shqiptarët grupin më të madh të njerëzve që aplikojnë për azil në Holandë. Nga ana tjetër ka rënë ndjeshëm numri i aplikuesve nga Siria.
Në periudhën e pikut, ishin 5 mijë sirianë që aplikonin në ditë për azil. Ky numër ka rënë në disa qindra për muaj. Nëse përfshihet dhe numri i sirianëve që shkojnë në Holandë për t’iu bashkua familjes ata mbeten ende grupi më i madh.
Mediat në Holandë shkruajnë se është e paqartë pse kaq shumë shqiptarë kërkojnë azil në Holandë. Shqipëria konsiderohet vend i sigurt origjine, që do të thotë se mundësi për të marrë azil janë të pakta. Që prej janarit, vetëm katër shqiptarë kanë përfituar këtë status.
Zeki Shehu, kreu i Këshillit Koordinues të shqiptarëve në Holandë thotë se shumë shqiptare nuk shohin ndryshim mes azilit dhe politikave të emigracionit. Ata janë në kërkim të një jetë më të mirë dhe ndaj aplikojnë për azil.
“Ata kërkojnë leje qëndrimi këtu dhe shohin nëse kjo gjë funksionon”, thotë Shehu. Në Shqipëri thotë ai nuk u thotë askush se ata kanë pak shanse të fitojnë statusin e azilantit.
Sipas Shehut, qeveria shqiptare përfiton nga azilkërkuesit në vende të tjera dhe ndaj inkurajojnë emigrimin. “Të gjithë vendet e Ballkanit jetojnë me paratë që emigrantët dërgojnë në vendet e tyre të origjinës”, shprehet ai.
Panorama
