Në një takim me gazetarët, ish-Kryeministri Sali Berisha ka paralajmëruar se duke parë situatën aktuale të azilkërkuesve, Shqipërisë së shpejti do t’i rikthehet sistemi i vizave.
Sipas Berishës, numri i lartë i shqiptarëve që po kërkojnë azil në Gjermani tregon për humbje të shpresës së qytetarëve në të ardhmen e vendit. Në këtë kuadër ish-kryeministri e cilësoi Ramën si një vrasës së shpresave të njerëzve.
“Duke parë numrin e lartë të azilkërkuesve, mun të themi se shumë shpejt Shqipërisë rrezikon t’i rikthehen vizat. Dhe e dini pse ikin njerëzit? Për bukën e gojës! Edi Rama është një vrasës i shpresës së njerëzve.” tha Berisha
Në lidhje me Samitin e Vjëns, Sali Berisha tha se qeveria shqiptare po shmang projektet kryesore, duke dërguar në samit projekte që nuk kanë fizibilitetin.
“Qeveria shqiptare dërgon atje projekte që nuk kanë fizibilitetin. Janë të ndikuara nga elektoralizmi., dhe shmang projektet më kryesore. Unë dua të them këtu se projekti i të gjitha projekteve rajonale për Shqipërinë, Kosovën dhe më tutje është hekurudha Tiranë- Prishtinë, apo më thjeshtë Milot-Prizren. Është kjo hekurudhë që bën që Shqipëria të përfitojë në shkallë maksimale nga pozicioni i saj strategjik”, tha Berisha.
