“Të dashur fermerë, dua të ndaj sot me ju lajmin se nisin pagesat direkte për Skemën Kombëtare 2026”, ky lajm u dha në datën 11 shtator nga drejtoresha e AZHBR-së, Ardita Kuçi.
Por vetëm dy ditë më parë po kjo drejtori ka bërë një tjetër njoftim duke rikthyer për rishqyrtim 223 aplikime. Në vitin 2025 inspektorët e AZHBR-së kanë përjashtuar nga skema kombëtare 223 fermerë për një periudhë 3-vjeçare.
Nëse i referohemi VKM-së, një fermer përjashtohet nga skema vetëm atëherë kur ai jep deklarata të rreme për sipërfaqen e të mbjellave apo numrin e gjësë së gjallë.
“Çdo subjekt, në rastet kur verifikohet se ka përfituar më shumë se 20% nga vlera për të cilën plotëson kriteret ose ka paraqitur dokumente të pasakta, përjashtohet 3 (tre) vjet nga e drejta e përfitimit prej masave mbështetëse për bujqësinë dhe zhvillimin rural, të financuara nga buxheti i shtetit.”
Por në njoftimin e AZHBR-së nuk jepet arsyeja se përse këta fermerë një vit më parë u “dënuan” nga AZHBR. Ky institucion pas një viti pranon se gjatë një “rikontrolli administrativ” është konstatuar se lista e aplikantëve të përjashtuar për një periudhë 3-vjeçare ishte hartuar jo në përputhje me Udhëzimin nr. 14.2025. Duke pranuar gabimin e vetë institucionit, 223 fermerëve u çelet drita jeshile të marrin subvencione nga shteti.
“Për këtë arsye, AZHBR vendosi shfuqizimin e listave të aplikantëve të përjashtuar nga e drejta e përfitimit për një periudhë 3-vjeçare dhe rikthimin e aplikimeve për vijimin e procedurës së shqyrtimit administrativ”, AZHBR.
Kjo do të thotë praktikisht se kandidatë që deri dje konsideroheshin jashtë skemës, tashmë rikthehen në garën për fondet e vitit 2026.
Rritja e numrit të fermerëve përfitues në skemën kombëtare, nga ana tjetër, pritet të ketë efekt financiar, ku ministrit të Bujqësisë, Andis Salla, do t’i duhet të kërkojë para shtesë nga buxheti i shtetit për të paguar fermerët e vjetër, që në faqen e AZHBR-së kanë marrë statusin e aplikantëve të rinj. /TCH/
