“Kush i rekruton të miturit në protestat e Berishës?” ishte pyetja që dominoi debatin në “Studio Live” në Report TV, teksa avokati Alban Duraj kërkoi hetim për organizatorët e protestave të Partisë Demokratike dhe për personat që vendosin në dispozicion mjete piroteknike për fëmijët e përfshirë në tubime.
Përballë tij, ish-kandidatja e PD-së Senada Mehmeti mbrojti protestat e opozitës dhe pretendoi se incidentet me molotovë nuk shkaktohen nga mbështetës të Partisë Demokratike, por nga persona të infiltruar nga policia.
“Organi i akuzës të hetojë organizatorët e protestës në PD, kush i rekruton të miturit dhe cilët janë ata që i kanë vënë në dispozicion mjetet piroteknike”, deklaroi Duraj.
Sipas avokatit, përfshirja e të miturve në protesta me tensione dhe përplasje me policinë nuk mund të konsiderohet normale për një forcë politike që pretendon të vijë në pushtet.
“Është shumë e rëndësishme. Kemi të mitur që nuk i kuptojnë veprimet e tyre. Opozita, që supozohet të jetë alternativë qeverisëse, përfshin në protesta fëmijë që u rrezikojnë jetën dhe shëndetin”, tha ai.
Nga ana tjetër, Senada Mehmeti këmbënguli se dhuna nuk lidhet me Partinë Demokratike dhe se në protesta janë futur persona që paraqiten si demokratë për të shkaktuar incidente.
“Në bazë të evidencave, janë gjetur disa elementë të futur nga policia, që hiqen si demokratë dhe pjesë e protestës, por kanë rol hedhjen e molotovëve”, deklaroi ajo.
Duke injoruar sulmet e Berishës ndaj ambasadorit të BE-së, Mehmeti insistoi gjithashtu se Partia Demokratike mbetet një forcë proeuropiane dhe se marrëdhënia e saj me Bashkimin Europian është ndryshe nga perceptimi që, sipas saj, krijohet në Tiranë.
“Është tjetër gjë ajo që relatohet në Tiranë, është tjetër gjë marrëdhënia e PD me BE-në si organizatë. Standardet e BE-së janë ato që ndjekim”, tha ajo, duke pretenduar se deklaratat e BE-së shtrembërohen për interesa politike.
Por për Durajn, problemi i opozitës nuk lidhet vetëm me protestat. Ai kritikoi edhe mënyrën si funksionon vetë Partia Demokratike, duke thënë se prej vitesh nuk po arrin të ndërtojë alternativë reale qeverisëse.
“Ne na duhet një opozitë alternative që nuk tradhton qytetarët për kauzat e saj. Kemi 13 vjet që opozita nuk jep alternativë qeverisëse”, deklaroi ai.
Duraj vuri në diskutim edhe standardet demokratike brenda PD-së, duke theksuar mungesën e garës reale në zgjedhjet për drejtimin e partisë.
“Mua si qytetar më shqetëson që në PD nuk ka zgjedhje të lira dhe të ndershme. Mbahen zgjedhjet për kryetarin pa pasur kandidatë alternativë”, tha ai.
