Thirrje dëshpëruese të prindërve për ndihmë. Fushatat në rrjete sociale për mbështetje financiare të fëmijëve të sëmurë duhet të marrin fund. Shoqëria civile ka ndërmarrë një nismë ligjore e cila synon të detyrojë Kuvendin e Shqipërisë për krijimin e një fondi kombëtar për çdo emergjencë shëndetësore të fëmijëve.
Projektligji i cili kërkon 20 000 firma qytetarësh ka trokitur edhe në derën e Avokatit të Popullit. “Shtysa finale ka qenë një rast në Korçë, një rast i cili ngaqë ishte afër nesh na bëri të mendojmë që duhet të ketë një zgjidhje, duhet të ketë një standard tjetër”, thanë përfaqësues të shoqërisë civile.
“Ligji konkretisht është të kërkojmë financim publik për shërbime shëndetësore për fëmijët tanë sa herë që këto shërbime nuk plotësohen për një arsye ose për një tjetër nga institucionet tona shtetërore. Pra, në të gjitha rastet kur spitalet në Shqipëri për arsye mungesë stafi, për arsye mungesë ilaçesh apo për arsye mungesë edhe pajisjesh dorëzohen përpara fëmijëve tanë dhe këtu flas për fëmijë mosha zero deri në 18 vjeç. Ndoshta dhe për sëmundje që nuk i kanë hasur asnjëherë. Prindërit dhe fëmijët të mos jenë në rrugë të madhe, prindërit dhe fëmijët mos t’ju rrezikohet i gjithë cikli i jetës, por të kemi një shans për shpëtimin e jetës së tyre përmes financimit publik të këtyre shërbimeve brenda apo jashtë vendit”, tha aktivistja Suela Koçibellinj.
“Nuk ka asnjë vend aq të varfër sa të mos të garantojë shëndetin e fëmijëve të vet dhe unë refuzoj të pranoj që Shqipëria është aq e varfër sa ne duhet të ngremë “Gofundme”. Nuk do kishte nevojë për këtë ligj, por fatmirësisht ju po e çoni përpara këtë ligj. Ne të gjithë si institucion jemi në mbështetje totale të kësaj nisme. Ne do të ushtrojmë ato kompetenca kushtetuese që kemi për të kërkuar Kuvendit që do të dëgjohemi vetëm për këtë çështje duke ju ftuar dhe ju që ta parashtrojmë këtë problematikë në Kuvendin e Shqipërisë”, tha Avokati i Popullit, Endri Shabani.
Përfaqësues të shoqërisë civile deklaruan se do të vijojnë mbledhjen e firmave në çdo qytet të vendit për ta depozituar më pas draftin në Kuvendin e Shqipërisë.
