Sipas Beqirit, nuk janë vetëm dosjet për vrasjet e Tropojës, Gërdecit, 21 janarit, 1997-ës, firmat piramidale etj., por edhe një tjetër që sapo ka shkuar në Prokurori sipas tij.
Beqiri shpjegoi se bëhet fjalë për vrasjen e njeriut i cili gjatë trazirave të vitit 1997 në Lushnjë, u lakua se përdori perimen e preshit për sulm ndaj Tritan Shehut, të cilin presidenti i asaj kohe Sali Berisha e kishte dërguar për negociata me protestuesit.
Avokati tha se pas asaj ngjarjeje të paprecedentë, Berisha mblodhi këshillin dhe njerëzit e afërt të tij, duke urdhëruar eliminimin fizik dhe sipas tij “njeriu që përdori preshin ndaj Shehit është vrarë dhe ajo dosje tani ka shkuar në Prokurori”.
Avokati nuk dha as emër dhe as detaje apo veprimet proceduriale të kryera në protokollim apo regjistrim, por theksoi se tashmë ajo i është bashkuar dosjeve të tjera që rëndojnë ndaj kreut të PD-së.
“Një tjetër vrasje që po i shkon Berishës atje është edhe vrasja e atij njeriut atje në Lushnjë, që përdori preshin te Tritan Shehu më 1997, ku Saliu thirri mbledhjen urgjent me njerëzit e tij në Gardë, Polici, Shik dhe urdhëroi vrasjen e ati personit të preshit. Është vrarë ai personi i preshit, ka edhe njerëz të implikuar atje në Lushnjë, që Berisha i ka përkrahur apo dekoruar pas kësaj. Po hetohet edhe ajo dosje, ka shkuar për hetim”, tha avokati për Report Tv, por pa dhënë shpjegime.
