Dhjetëra avokatë në mbarë vendin i janë përgjigjur thirrjes për protestë nga ana e Dhomës së Avokatisë, duke braktisur kështu një sërë seancash gjyqësore. Protesta zhvillohet kundër vendimit të Këshillit të Ministrave që përcakton një nivel të ri të pagës së referencës si dhe rritje të tarifave të shërbimeve dhe kontributeve shoqërore.
Vetëm në Tiranë janë numëruar më shumë se 60 seanca të shtyra për shkak të bojkotit të avokatëve, përfshi këtu gjyqet civile dhe penale.
Edhe avokatët në Fier bojkotuan seancat . Shkak është bërë vendimi i qeverisë për rritjen e tarifave të shërbimeve dhe kontributeve të sigurimeve shoqërore per këtë profesion.
Rreth 60 seanca gjyqësore të planifikuara për këtë të hënë në Gjykatën e Fierit do të shtyhen sepse nuk mund të zhvillohen pa praninë e avokatëve. Duke respektuar parimet penale Dhoma e Avokatisë ka caktuar një avokat të gatshëm për seancat për masë sigurie, ndërsa do të penalizohet çdo avokat që shkel urdhërin e Dhomës Kombëtare të Avokatisë nëse merr pjesë në seancat
Në Fier ushtrojnë aktivitetin e tyre 370 avokatë.
Edhe Dhoma Rajonale e Avokatisë Elbasan i është bashkuar grevës së paralajmëruar nga Dhoma Kombëtare e Avokatisë e cila kundërshton paketën fiskale të qeverisë ku parashikohet rritja e taksave për profesionaet e lira. Avokatët theksojnë se neës nuk do të mbrojnë të drejtat e tyre nuk do të jenë të aftë të mbrojnë të mbrojnë të drejtat e qytetarëve, shkruan TCH.
Edhe në Lushnje, avokatet i janë përgjigjur thirrjes së shoqatës për të bojkotuar seancat gjyqësore. Rreth 35 avokatë të Dhomës së Avokatisë së Lushnjes u mblodhën përpara gjykatës, duke u shprehur kundër vendimeve të marra nga qeveria për nivelin e tatimit për sigurimet shëndetësore dhe shoqërore ndaj tyre. Kreu i dhomes se avokatëve në Lushnje, Kozma Jano tha se kjo grevë do të përshkallëzohet në ditët në vazhdim.
Pati edhe avokatë që pohuan se ky vendim është në kundërshtim me Kushtetutën, sepse, sipas tyre nuk mund të përcaktojë qeveria pagën e avokatëve.
Në gjykatën e Lushnjës u zhvilluan me prezencë të avokatëve vetem seancat e vlerësimit të masave të sigurisë.
