Një avion transporti i kompanisë UPS është rrëzuar të martën pasdite, 4 nëntor, gjatë ngritjes nga aeroporti Louisville Muhammad Ali në Kentucky të Shteteve të Bashkuara, duke shpërthyer në flakë.
Mediat e huaja raportojnë një bilanc tragjik me të paktën shtatë të vdekur, numër që pritet të rritet.
Fluturimi me tre anëtarë ekuipazhi në bord, po nisej drejt Honolulu-t kur u përplas rreth orës 17:15 në një zonë afër aeroportit, ku ndodheshin dy biznese, një qendër riciklimi nafte dhe një fabrikë pjesësh automjetesh.
Zyrtarët thanë se avioni kishte rreth 144,000 litra karburant çka shkaktoi shpërthimin e fuqishëm, pasuar me re të madhe tymi të zi që u ngrit mbi qytet.
Te fabrika e pjesëve të makinave janë raportuar dy viktima, ndërsa janë plagosur disa të tjerë.
“Për shkak të natyrës së bizneseve në atë zonë, mund të duhet kohë për të konfirmuar nëse ka persona të tjerë nën rrënoja”, bëjnë me dije autoritetet, duke u bërë thirrje banorëve të qëndrojnë të strehuar për shkak të tymit toksik dhe rrezikut nga shpërthime të tjera.
Sipas zyrtarëve të emergjencës, zjarri ishte aq i madh sa u deshën orë të tëra për ta vënë nën kontroll. Zona e prekur përfshin një bllok të tërë industrial me depo karburanti, çka e bëri ndërhyrjen e zjarrfikësve jashtëzakonisht të rrezikshme.
Autoritetet federale, përfshirë NTSB dhe FAA, kanë nisur hetimet për të zbuluar shkaqet e aksidentit. Sekretari amerikan i Transportit, Sean Duffy, e quajti ngjarjen tronditëse, ndërsa senator Mitch McConnell falënderoi ekipet e shpëtimit për reagimin e menjëhershëm.
Kompania UPS, që ka selinë kryesore të operacioneve ajrore në Louisville dhe punëson rreth 25 mijë persona në qytet, pezulloi përkohësisht procesin e shpërndarjes së pakove në qendrën “Worldport”.
