Avioni i rrëzuar në Ishëm i pilotit Italian Guido Guidi nuk ka patur asnjë defekt teknik apo humbje të kontrollit për shkak të turbulencave ajrore të ndodhura më shtator 15 shtator 2016 ditën kur u rrëzuar në grykderdhjen e Ishmit.
Është ky rezultati i hetimit teknik të kryer nga Aviacioni Civil shqiptar i cili një muaj pas rënies së avionit në Ishëm ka depozituar pranë Prokurorisë, Ministrisë së Transporteve dhe Policisë së Shtetit raportin përfundimtar të hetimit.
Burime nga Report Tv pranë grupit hetimor konfirmuan dorëzimin e raportit nga aviacioni civil, hetuesit e të cili ishin të pranishëm më 15 shtator në pistën e improvizuar të uljes së avionit siç dhe shihet në pamje.
Në këtë raport rezultati është se avioni s’ka patur defekt teknik, kushtet atmosferike kanë qenë normale dhe në zonën e Ishmit s’ka patur as turbulencë ajrore as rryma ajri të forta që mund të kenë shkaktuar devijimin e fluturimit të avionit.
Një tjetër rezultat i nxjerr nga hetuesit teknik të aviacionit civil është fakti se avioni është rrëzuar për shkak të përplasjes së rrotës së parë të mjetit fluturues me tokën si pasojë e manovrës së gabuar të pilotit.
Përplasja, thonë hetuesit ka ndodhur teksa avioni kishte nisur ngritjen dhe shkëputjen nga toka dhe në lartësinë 40 cm mbi sipërfaqen e tokës avioni ka pësuar një humbje lartësie duke sjellë për pasojë përplasjen e rrotës së parë në tokë.
Ajo çka mbetet pa përgjigje nga ky hetim administrativ teknik është fakti se përse ka humbur kontrollin piloti kur avioni model piper i drejtuar prej tij nuk ka patur defekt teknik të mëparshëm apo gjatë momentit të uljes.
Sipas raportit rezulton se piloti Italian ka kryer një ulje normale në pistën e improvizuar dhe pasi ka qëndruar për disa minuta ka bërë më pas ngritjen e cila ka rezultuar fatale duke sjellë për pasojë rrëzimin e avionit.
Në momentin e mbërritjes së policisë në Ishëm piloti Italian deklaroi se ishte aksidentuar pasi avioni model Piper kish patur defekt, por këtë version ai e ndërroi duke pranuar më pas se në Shqipëri kishte ardhur për të kryer trafik droge dhe do të testonte pistën për tu kthyer e marrë një ngarkesë canabisi prej 200 kg.
Me rezultatin e hetimit të aviacionit civil ku mjeti fluturues nuk ka patur asnjë defekt hetuesit tashmë kanë rrëzuar pistën e parë të deklaruar nga Gudio dhe po mundohen të zbardhin nëse është pesha si pasojë e ndonjë ngarkesë droge të future në avion apo manovra e gabuar e pilotit italian që po testonte pistën.
Aktualisht avioni në pronësi të Aero Club Savona ndodhet i sekuestruar në Ishëm për llogari të hetimit të prokurorisë së krimeve të rënda.
Në Shqipëri qëndron dhe piloti Guido Guidi si person që ka pranuar të bashkëpunojë me drejtësinë Shqiptare për të zbardhur rrjetin e trafikantëve që e kontaktuan atë të kryejë transportin e drogës./report tv/.a.k
