Ish-kryeministri Sali Berisha postoi foton e një avioni mbi pistën e Gjadrit, duke hedhur dyshimet se bëhet fjalë për një avion droge. Por ka reaguar Shtabi i FA, që nëpërmjet një deklarate sqaron se bëhet fjalë për avionin e një vendi aleat që fluturoi në territorin tonë në kuadër të një stërvitjeje.
Deklarata:
Shtabi i Përgjithshëm i Forcave të Armatosura të Republikës së Shqipërisë dëshiron të informojë opinionin publik për një avion që është parë të fluturojë mbi Bazën Ajrore të Gjadrit.
Avioni ushtarak tip c-130J pjesë e një stërvitjeje të një vendi aleat, ka hyrë në hapësirën ajrore të Republikës së Shqipërisë në Gjirokastër në orën 13:15, ka fluturuar deri në Shkodër, dhe më pas është kthyer për të dalë nga hapësira jonë ajrore në Korçë, në orën 14:54.
Kjo stërvitje e aleatëve do të vijojë deri në mesin e muajit nëntor.
Shtabi i Përgjithshëm i siguron qytetarët mbi ligjshmërinë e këtyre lëvizjeve dhe kërkon mirëkuptimin e tyre pasi vendi ynë tashmë është një rajon gjithnjë e më i preferuar për stërvitje nga aleatët./a.m.
