Zbardhet dëshmia e personit që pa nga afër vrasjen e Aris Papas, shqiptarit që u qëllua dje për vdekje në Athinë, i njohur gjithashtu për nofkën “Mili”. Media greke “Newsbomb” shkruan se autori e qëlloi viktimën pa hyrë në kafenë, ndërsa më pas ai u largua në këmbë nga skena e krimit.
Vrasësi kishte vendosur një kapele dhe një maskë anti-COVID për të mos u njohur dhe qëlloi mbi shënjestrën e tij 8 herë në kokë.
“Autori ishte i shkurtër dhe i hollë. Ai nuk hyri brenda, qëndroi jashtë derës dhe qëlloi. Pranë tij ishte një çift që pinte kafe, ndaj ai pasi vrau u kthye dhe iku me vrap. Në dy deri në tre minuta policët e parë erdhën sepse ishin shumë pranë. Ata patrulluan rrugëve por nuk gjetën asgjë. Unë nuk e pashë fytyrën e autorin e krimit sepse isha larg, por pashë skenën,“-tha ai.
Aris Papas i cilësuar nga mediat greke si një nga anëtarët më të njohur të mafies shqiptare u ekzekutua pasditen e djeshme në një lokal duke pirë kafe në qendër të Athinës. Shqiptari i njohur si “Mili” u bashkua në radhët e mafies shqiptare shumë vite më parë, ndërsa në artikull ngrihen dyshime edhe për armikun e 34-vjeçarit që u vra dje, ndaj të cilit ishin organziuar gjithsej plot 3 atentate.
Ndërkohë një tjetër pistë ka dalë nga mediat greke për vrasjen e shqiptarit Aristidh Papa në Athinë pasditen e kaluar.
Dyshohet se shqiptari është përfshirë në atentatin e 9 prillit ndaj gazetarit të kronikës së zezë, Giorgos Karaivaz i cili u ekzekutua pasi kishte dalë nga një emision televiziv dhe po dilte nga makina për ët hyrë në shtëpi.
Sipas mediave greke, ndoshta disa persona kërkonin t’i mbyllnin gojën shqiptarit për vrasjen në fjalë.
g.kosovari
