Më sa duket në PD ose harrojnë shpejt, ose kanë mungesë të theksuar koordinimi. Ndonëse, kanë 10 ditë që e kanë lënë të bëjë fushatë prej vetmitari, pasi as Basha, as Berisha, madje asnjë nga deputetët e PD nuk e shoqëron në takimet e tij të montuara me qytetarët e Tiranës, Halim Kosovën e detyruan sot të bëjë edhe një autogol tjetër, duke e çuar me zor në një dëgjesë live me tregtarë të tregut të fruta-perimeve te Uzina Dinamo.
Deri këtu nuk ka ndonjë gjë të keqe, por nëse i rikthehemi historisë së shtatorit 2013 me Bashkinë e Tiranës të drejtuar nga Lulzim Basha, situata kthehet përmbys dhe Halim Kosova na del një personazh naiv që e çojnë për dore në vendet e gabuara. Sepse nuk është e largët koha (shtator 2013 pra), kur Policia Bashkiake e drejtuar nga Vullnet Topalli u përlesh me tregtarët e këtij tregu, në përpjekje për ta mbyllur atë, duke bllokuar me dhunë punën e tyre.
Por, Dr. Halimi nuk ka nga ta dijë këtë, edhe pse sot e shoqëronte ish nënkryetarja e Bashkisë së Lulit, Jorida Tabaku. Ai ishte sjellë te të njëjtit tregtarë të Uzinës Dinamo, të cilët vetë Basha ua kishte shkatërruar tregun dy vjet më parë, si një kukull naive që po recitonte fjalët e radhës.
Tregu i fruta perimeve në këtë zonë të Tiranës është i vendosur prej 14 vitesh te ish- uzina Dinamo ku janë të punësuar 5.200 persona. Pas përleshjes me Policinë Bashkiake tregtarët u shprehën se Bashkia po u hiqte bukën e gojës, pasi ishte e vetmja mënyrë jetese që ata kanë. Ata e lidhnin bllokimin e tregut me interesa personale të kryetarit të bashkisë, Lulzim Basha, e pse jo ndërtimin e një tjetër pallati aty.
