Detaje të reja dalin në dritë në lidhje me ngjarjen e dy ditëve më parë ku mbeti i plagosur në Vlorë shtetasi Florjan Meçe. Ndonëse polica e cilësoi plagosjen e tij si grabitje për t‘i vjedhur me dhunë automjetin e llojit “BMWX6”, me targë AA 333 MK, portofolin me një sasi parash prej 500 eurosh, disa bizhuteri personale, si dhe aparatin celular, burime të “Panoramës” nuk përjashtojnë konflikte të tjera të hapura mes palëve, duke u nisur edhe nga e kaluara me precedentë e të dyja palëve, si të plagosurit ashtu edhe autorit. Dyshimet ngihen edhe për faktin se grabitja ka ndodhur 1 orë para atentatit me armë, ku Meçe mbeti i plagosur.
Policia po heton të gjitha pistat e mundshme, pasi ende nuk ka një shpjegim pse personit që iu grabit mjeti nuk ka kryer denoncim. Ai ka shkuar në kafe pas ngjarjes, vend ku edhe është përplasur sërish me autorët.
Për plagosjen e Florjan Meçes, i dënuar më parë për vrasje, policia arrestoi Olgert Shehun 38 vjeç dhe Hajri Xhaferi, 53 vjeç, që të dy banues në Vlorë, ndërsa ka shpallur në kërkim si autor kryesor të krimit Klejvis Gjahtarin, 29 vjeç.
Gjahtari rezulton person që ka qenë i shpallur në kërkim për veprën penale “largimi i të burgosurit nga vendi i qëndrimit” në vitin 2012. Por, ndonëse person i shpallur në kërkim, ai ka arritur të dalë lirshëm në Vlorë, madje të kryejë një tjetër krim. Policia e akuzon se ka grabitur më parë e më pas tentuar të vrasë një tjetër të dënuar po për vrasje.
“Gjatë veprimeve hetimore të kryera, ka rezultuar se shtetasi Klejvis Gjahtari, në bashkëpunim me shtetasin Olgert Shehu, para kryerjes së plagosjes në lagjen ‘Ujë i ftohtë’ dyshohet se kanë vjedhur me dhunë shtetasin F.M. Rreth 1 orë më vonë pas konfliktit për arsyet e mësipërme, në një rrugicë të lagjes ‘Pavarësia’, dyshohet se shtetasi Klejvis Gjahtari ka plagosur me armë zjarri të llojit ‘pistoletë’ shtetasin F.M., i cili ndodhet në spitalin rajonal në gjendje shëndetësore jashtë rrezikut për jetën”, sqarohej në njoftimin e policisë.
ma.me
