Sot u dha arrest me burg për 4 të rinjtë e arrestuar pas përplasjes me armë në pedonalen e qytetit, si pasojë e së cilës mbeti e plagosur një kalimtare.
I vetmi që foli para trupës gjykuese ishte Ension Buraku, i cili dyshohet se ishte i përfshirë drejpërdrejtë në konflikt. një prej të përfshirëve drejtpërdrejtë në konflikt.
Buraku pranoi në gjykatë se ka dyshime që tritolin motrës, efektive policie në Durrës, ia ka vendosur i riu nga Shkodra. Për këtë arsye udhëtoi për të takuar përballë Mirsad Matën, i cili ishte ulur në një stol pranë makinës.
Kur ky i fundit i është afruar, sipas Ension Burakut, ka nxjerrë pistoletën e ka qëlluar në drejtim të tij dhe 2 personave të tjerë. Atëherë pati breshëri plumbash pasi iu kundërpërgjigj Buraku.
Julian Ballta, avokati mbrojtës i Ension Buraku, tha për mediat se u kërkua arrest shtëpie, por u vendos arrest me burg për te katërt.
“Ension Buraku është nisur për një sqarim dhe kjo vërtetohet nga kamerat e sigurisë, por edhe për faktin se ka tentuar që ta takoje në pedonalën e Shkodrës. Kanë patur marrëdhënie të mira familjare dhe nuk ka patur asnjë qëllim qe t’i bënte atentat, por vetëm të sqarohej. Për arsye të konflikteve dhe një lloj pasigurie ka patur armë me vete. Të tjerët kanë deklaruar që nuk kanë patur dijeni dhe se ka qenë Mirsad Meta ai që ka qëlluar i pari dhe nuk ka pritur fare që të sqarohet. Kjo nuk lidhet me pazare droge. Ension Buraku ka dyshime te forta se tritoli motrës së tij ia ka vendosur Mirsad Meta, por kjo nuk është e vërtetuar. Konfliktet e tyre kane ardhur gradualisht që nga koha kur kanë qenë në Gjermani dhe nga hatërmbetje të vogla janë shtuar në 3-4 vite pastaj”, tha avokati.
Të rinjtë e tjerë të arrestuar janë identifikuar si Liridon Lushi, 27 vjeç, Arxhend Rexha, 31 vjeç, Ension Buraku, 28 vjeç, dhe Riad Xheladini, 22 vjeç. Ata akuzohen për veprat penale “Vrasja në rrethana të tjera cilësuese”, “Plagosja e lehtë me dashje” dhe “Armëmbajtja pa leje”.
/a.r
