Policia e Tiranës shoqëroi disa persona të dyshuar për plagosjen e biznesmenit Artur Aligjoni në zonën e ish-Bllokut, në Tiranë, por ende nuk ka asnjë autor të ndaluar. Të shoqëruarit kanë mohuar përfshirjen në ngjarje, duke dhënë alibi të ndryshme, por, nga ana tjetër, ka qenë edhe vetë i plagosuri që me dëshminë e tij ka bërë që asnjëri prej të dyshuarve të mos mbahej në qeli.
Pronari dhe menaxheri i disa lokaleve ka dëshmuar para oficerëve të Policisë, por nuk ka bashkëpunuar, duke u shprehur se nuk e di kush e ka qëlluar me armë. Ndërsa i pyetur konkretisht rreth problemeve që ai ka pasur disa muaj më parë me shtetasin Halim Hysa, i cili po ashtu u plagos shtatorin e vitit të kaluar, 41-vjeçari e ka përjashtuar nga kjo histori, shkruan “Panorama”.
Aligjoni ka deklaruar se nuk ka më asnjë konflikt me 33-vjeçarin Hysa, duke thënë se problemet mes tyre janë sheshuar. Në këto kushte, por edhe duke mos pasur asnjë provë konkrete për të mbajtur të ndaluar 5 personat e shoqëruar, Policia është detyruar t’i lirojë pasi u ka marrë deklarimet.
Nga ana tjetër, të njëjtin version si i plagosuri ka dhënë edhe shtetasi Halim Hysa, pronar e instruktor i një palestre në zonën e Institutit, në Kodër Kamzë. Si Aligjoni, edhe Hysa nuk pati bashkëpunuar me Policinë shtatorin e vitit të kaluar, kur u qëllua me thikë nga 4 persona, duke pretenduar se nuk njihte asnjërin prej tyre. Në atë kohë Aligjoni u ndalua, por për shkak se plagosja ishte e lehtë dhe personi nuk pati probleme për jetën, i dyshuari u hetua në gjendje të lirë.
HETIMI
Pronari dhe menaxheri i disa klubeve të natës në Tiranë e Vlorë, Artur Aligjoni, u plagos dy ditë më parë me një plumb pistolete në këmbë, pas një atentati që u organizua ndaj tij në rrugën “Ismail Qemali”, në zonën e ish-Bllokut.
Ngjarja ndodhi në orën 04:35 të mëngjesit të së shtunës, kur 41-vjeçari Aligjoni, pronari i një klubi të njohur në kryeqytet, u qëllua me armë, por arriti t’i shpëtojë atentatit dhe aktualisht ndodhet jashtë rrezikut për jetën. Policia tha se autori i dyshuar i ngjarjes ka qenë një person i vetëm, i cili, sipas pamjeve të marra nga kamerat e sigurisë, i është afruar në këmbë biznesmenit, duke e qëlluar me armë zjarri.
I plagosuri, sipas Policisë, ka qenë i shoqëruar më parë dhe është hetuar për plagosjen e shtetasit Halim Hysa, që ndodhi në fund të muajit shtator. Kjo është pista kryesore ku po heton Policia e Tiranës, pasi dyshohet se plagosja mund të ketë ndodhur në shenjë hakmarrjeje për ngjarjen e ndodhur vitin e kaluar.
Megjithatë, vetë i plagosuri e ka mohuar këtë dyshim të Policisë. Nga ana tjetër, burimet thanë se kanë dyshime që Aligjoni nuk ka dëshirë të flasë mbi ngjarjen dhe po u shmanget hetimeve. Hetuesit tashmë janë përqendruar në marrjen e informacioneve dhe të dhënave të tjera që lidhen me atentatin e mëngjesit të së shtunës.
ma.me
